बुटाला हायस्कूलमध्ये प्रतिनिधीसाठी निवडणूक

चिपळुणात ठाकरे सेनेचे
संपर्क कार्यालय
चिपळूणः उद्धव ठाकरे यांच्या वाढदिवसाचे औचित्य साधून येथील रॉयल पार्कमध्ये ठाकरे सेनेचे संपर्क कार्यालय सुरू केले आहे. जिल्हाप्रमुख बाळा खेडेकर, जिल्हा समन्वयक मंगेश शिंदे, विधानसभा क्षेत्राध्यक्ष बाळा कदम, तालुका समन्वयक सुधीर शिंदे, राजू देवळेकर व महिला उपजिल्हा संघटिका धनश्री शिंदे यांच्या उपस्थितीत कार्यालयाचे उद्घाटन झाले. चिपळूण तालुका आणि शहरामधील जनतेशी थेट संपर्क, संघटनात्मक बांधणी आणि कार्यकर्त्यांचे सशक्तीकरण करणे, हा उद्देश असून तसेच नागरिकांना त्यांच्या समस्या मांडण्यासाठी कार्यालयाची आवश्यकता होती. हे कार्यालय म्हणजे जनतेसाठी खुलं व्यासपीठ असेल, असे तालुकाप्रमुख बळीराम गुजर यांनी सांगितले.
-----
बुटाला हायस्कूलमध्ये
प्रतिनिधीसाठी निवडणूक
गावतळेः दापोली तालुक्यातील श्रीमान मथुरभाई बुटाला हायस्कूल व ज्युनिअर कॉलेज गावतळे येथे विद्यार्थ्यांना निवडणूक प्रक्रियेची माहिती व्हावी यासाठी स्वराज्य सभा उपक्रमांतर्गत विद्यार्थी व विद्यार्थिनी प्रतिनिधीची निवडणूक प्रक्रियेद्वारे निवड करण्यात आली. ही संकल्पना प्राचार्या भक्ती सावंत यांनी मांडली होती. उमेदवारी अर्ज दाखल करणे, त्याची छाननी, उमेदवारी अर्ज माघारी घेणे, उमेदवारांच्या प्रचारासाठी कालावधी असा कार्यक्रम निश्चित केलेला होता. विद्यार्थ्यांना मतपत्रिका देण्यात आली होती. मतदार यादीनुसार प्रकिया पार पडली. विद्यार्थी प्रतिनिधी म्हणून स्वरित घरटकर व विद्यार्थिनी प्रतिनिधी म्हणून अनुजा पवार यांची निवड झाली.
------------
शेट्ये स्मृतिदिनानिमित्त
साखरप्यात कार्यक्रम
संगमेश्वर ः नानासाहेब शेट्ये यांचा ३२वा स्मृतीदिन १ ऑगस्टला साखरपा येथील नानासाहेब शेट्ये सभागृह येथे होणार आहे. (कै.) नानासाहेब शेट्ये स्मारक समितीच्यावतीने या कार्यक्रमाचे आयोजन करण्यात आले आहे. या वेळी विद्यार्थी गौरव आणि पुरस्कार वितरण कार्यक्रम होईल. कार्यक्रमाला अध्यक्ष दत्ताराम शिंदे, सुभाष लाड, विजय बाईंग उपस्थित राहणार आहेत. कार्यक्रमात २०२४-२५ या शैक्षणिक वर्षातील शिष्यवृत्तीप्राप्त विद्यार्थी, दहावी-बारावीच्या सर्व शाखांमधून प्रत्येक शाळेतून प्रथम क्रमांकाने उत्तीर्ण झालेल्या विद्यार्थ्यांचा सत्कार करण्यात येणार आहे. तसेच (कै.) नानासाहेब शेट्ये यांच्या नावे दिल्या जाणाऱ्या व्यक्ती व संस्था यांनाही पुरस्कार देऊन सन्मानित केले जाणार आहे.