सावंतवाडीत सक्षम मुख्याधिकारी नेमा

80546

सावंतवाडीत सक्षम मुख्याधिकारी नेमा

बबन साळगावकर; अन्यथा १५ ऑगस्टला उपोषण

सकाळ वृत्तसेवा
सावंतवाडी, ता. २८ ः येथील नगरपालिकेत तातडीने कायमस्वरुपी मुख्याधिकारी नेमा; अन्यथा १५ ऑगस्टला उपोषण छेडण्याचा इशारा माजी नगराध्यक्ष बबन साळगावकर यांच्यासह माजी नगरसेवकांनी दिला आहे. याबाबत पालकमंत्री नीतेश राणे यांनी तातडीने लक्ष घालावे, असे आवाहनही त्यांनी केले आहे.
श्री. साळगावकर यांनी याबाबत पत्रक प्रसिद्धीस दिले आहे. त्यात म्हटले आहे की, ‘एक ना धड, भाराभर चिंध्या’ अशी अवस्था सावंतवाडी पालिकेच्या विकासकामांची झाली आहे. नागरिकांमध्ये प्रशासनाच्या कारभाराविरोधात प्रचंड असंतोष असून, प्रशासनावर कोणाचेही नियंत्रण राहिलेले नाही. प्रत्येक अधिकारी स्वतःच मुख्याधिकारी असल्याप्रमाणे वागत आहेत. शहरात स्वच्छतेचे तीनतेरा वाजले असून, जागोजागी कचऱ्याचे ढिगारे दिसत आहेत. लाडाची बाग येथील डम्पिंग ग्राउंडची अवस्था अत्यंत भयानक झाली आहे. परिसरात दुर्गंधी पसरली आहे. पाणीपुरवठ्याबाबत प्रशासनाचे अक्षम्य दुर्लक्ष आहे. पथदीपांच्या अनेक तक्रारी असून, शहरातील रस्त्यांवर मोठमोठे खड्डे पडले आहेत. याच वर्षी एप्रिल-मेमध्ये केलेल्या रस्त्यांवरही खड्डे पडले आहे. शहरात पार्किंगची व्यवस्था गंभीर बनली आहे. रस्त्याच्या कडेला गवत वाढलेले असून, अनेक ठिकाणी काँक्रिटचे रस्ते निसरडे झाले आहेत. त्यामुळे पादचारी घसरून पडत आहेत. प्रशासनाच्या बैठका नियमित होत नाहीत, त्यामुळे कर्मचाऱ्यांवर नियंत्रण नाही.’
---
...अन्यथा १५ आॅगस्टला उपोषण
बांधकाम, आरोग्य आणि पाणीपुरवठा खाते सुशेगाद आहेत. कर्मचाऱ्यांची मनमानी सुरू आहे. या सर्व प्रकारांना आवर घालण्यासाठी सावंतवाडीत सक्षम मुख्याधिकारी कायमस्वरुपी नेमण्याची गरज आहे. तो तत्काळ नेमण्यात यावा; अन्यथा १५ ऑगस्टला उपोषण छेडण्यात येईल. या प्रश्नावर जिल्ह्याचे पालकमंत्री नीतेश राणे यांनी तत्काळ लक्ष घालावे, अशी मागणीही साळगावकर यांच्यासह नगरसेवक विलास जाधव, सुरेश भोगटे, अफरोज राजगुरू, उमेश कोरगावकर यांनी केली आहे.