लेदर बॉल इनडोअर नेटचे मालवणात उद्घाटन

80553

लेदर बॉल इनडोअर नेटचे मालवणात उद्घाटन
‘विनर्स स्पोर्ट्स’चा पुढाकारः खेळाडूंना पावसाळ्यातही सरावाची संधी
सकाळ वृत्तसेवा
मालवण, ता. २८ः पावसाळ्यातही लेदर बॉल क्रिकेट प्रशिक्षणाची संधी मिळावी, या उद्देशाने मालवण येथे पहिले लेदर बॉल इनडोअर क्रिकेट प्रशिक्षण नेट सुरू केले आहे. येथील विनर्स स्पोर्ट्स अकॅडमीच्या वतीने संदीप पेडणेकर यांच्या गवंडीवाडा येथील जागेत या अत्याधुनिक इनडोअर नेटचे उद्घाटन करण्यात आले. अकॅडमीतील खेळाडूंच्या हस्ते फीत कापून आणि राजन परुळेकर यांच्या हस्ते उद्घाटन पार पडले.
साधारणपणे लेदर बॉल क्रिकेटचा सराव खुल्या मैदानावर किंवा मैदानातील नेटमध्ये केला जातो. परंतु, पावसाळ्यातील चार ते पाच महिन्यांच्या कालावधीत हा सराव पूर्णपणे थांबतो, ज्यामुळे खेळाडूंच्या प्रगतीत खंड पडतो. याच गोष्टीचा विचार करून विनर्स स्पोर्ट्स अकॅडमीने पुढाकार घेतला आणि या इनडोअर नेटची निर्मिती केली. विनर्स स्पोर्ट्स अकॅडमीचे प्रशिक्षक सुशील शेडगे म्हणाले, ‘‘मालवणमधील हे पहिले इनडोअर क्रिकेट नेट आहे. लहान मुलांच्या प्रगतीसाठी आणि जिल्ह्यामध्ये, देशामध्ये किंवा राष्ट्रामध्ये आपले खेळाडू चमकले पाहिजेत या उद्देशाने आम्ही ही अकॅडमी सुरू केली आहे. ही अकॅडमी रजिस्टर आहे. लेदर बॉल क्रिकेटमध्ये मालवणमध्ये खेळाडू तयार करणे हा आमचा मुख्य उद्देश होता. पावसाळा सुरू झाला की क्रिकेटचा नेट बंद होतो आणि त्यामुळे मुलांची प्रॅक्टिस होत नाही. सिंधुदुर्ग जिल्ह्यात सावंतवाडी आणि कुडाळ येथे इनडोअर क्रिकेट नेट उपलब्ध आहेत, त्यामुळे तिथल्या अंडर-१४ आणि अंडर-१७ संघांनी चांगली कामगिरी केली आहे. मालवणमध्ये सरावाची कमतरता असल्याने चांगले संघ आणि खेळाडू तयार होत नव्हते. हे चित्र बदलण्याच्या उद्देशानेच आम्ही या इनडोअर क्रिकेट नेटचे उद्घाटन केले आहे. याचा तालुक्यातील मुलांनी जास्तीत जास्त फायदा घ्यावा.’’
विनर्स स्पोर्ट्स अकॅडमीचे प्रशिक्षक संदीप पेडणेकर, ज्ञानेश केळूसकर आणि सुशील शेडगे यांनी तालुक्यातील सर्व मुला-मुलींनी या सुविधेचा लाभ घेण्याचे आवाहन केले आहे. यावेळी राजन परुळेकर, संध्या परुळेकर, नितीन मांजरेकर, अण्णा कारेकर, रवी मालवणकर, सनी परुळेकर, मीनल परब, संतोष परब, विलास पेडणेकर, अश्विनी परुळेकर, रिजवान शेख, उमेश मांजरेकर, साईवेद मालवणकर, हेमंत शिरगावकर, गितेश मुणगेकर, पिंकू मोरे, छोटू तोडणकर, सुमन पेडणेकर, दादा मंडलिक, संजय परुळेकर, रोहित चव्हाण, मार्शल डिसोझा, आशा पेडणेकर, हनुमंत रेवंडकर, दिक्षा मालवणकर उपस्थित होते.