डॉ. खोत यांचे कार्य अभिमानास्पद

80630
कुडाळ ः येथील कार्यक्रमात प्रा. डॉ. एम. आर. खोत यांचा सत्कार करताना तहसीलदार वीरसिंग वसावे व मान्यवर.

डॉ. खोत यांचे कार्य अभिमानास्पद

वीरसिंग वसावे ः कुडाळात ‘रोटरी’तर्फे सत्कार सोहळा

सकाळ वृत्तसेवा
मालवण, ता. २८ : सिंधुदुर्ग जिल्ह्याच्या शैक्षणिक आणि संरक्षण क्षेत्रात स. का. पाटील महाविद्यालय येथील राष्ट्रीय छात्र सेनेच्या विद्यार्थ्यांनी आपल्या अतुलनीय कामगिरीने जिल्ह्याचे नाव राष्ट्रीय स्तरावर उज्वल केले आहे. एनसीसी प्रशिक्षक लेफ्टनंट डॉ. एम. आर. खोत यांच्या मार्गदर्शनाखाली विद्यार्थ्यांनी मिळविलेले यश हे केवळ महाविद्यालयासाठीच नव्हे, तर संपूर्ण सिंधुदुर्ग जिल्ह्यासाठी अभिमानास्पद आहे, असे प्रतिपादन कुडाळचे तहसीलदार वीरसिंग वसावे यांनी केले.
रोटरी क्लब ऑफ कुडाळच्या वतीने सिंधुदुर्ग महाविद्यालयाचे एनसीसी प्रशिक्षक लेफ्टनंट डॉ. खोत यांचा कुडाळ येथे सत्कार करण्यात आला. यावेळी श्री. वसावे बोलत होते.
श्री. वसावे पुढे म्हणाले, "स. का. पाटील महाविद्यालयाचे एनसीसी विद्यार्थी आरडीसी परेडसाठी सिंधुदुर्ग जिल्ह्यामधून निवडले जाणारे एकमेव महाविद्यालय ठरले होते. ही निवड डॉ. खोत यांची शिस्तबद्धता, कठोर परिश्रम आणि उत्कृष्ट प्रशिक्षणाची साक्ष देते. दिल्ली येथे होणाऱ्या या प्रतिष्ठित परेडमध्ये सहभागी होणे हे प्रत्येक एनसीसी कॅडेटचे स्वप्न असते आणि ते स्वप्न मालवणच्या या विद्यार्थ्यांनी डॉ. खोत यांच्या मार्गदर्शनामुळे प्रत्यक्षात उतरवले. महाविद्यालयाच्या एनसीसी विद्यार्थ्यांची यशस्वी घोडदौड सुरूच आहे. केवळ एनसीसीपुरतेच मर्यादित न राहता महाविद्यालयाचे माजी एनसीसी विद्यार्थी भारतीय सैन्य दलातही जिल्ह्याचे नाव रोशन करत आहेत. जिल्ह्यासाठी गौरवास्पद अशी ही कामगिरी महाविद्यालयाच्या एनसीसी विभागाच्या प्रभावी प्रशिक्षणाचे द्योतक आहे."
यावेळी डॉ. खोत यांचा कुडाळ रोटरी क्लबतर्फे श्री. वसावे यांच्या हस्ते मान्यवरांच्या उपस्थितीत सत्कार करण्यात आला. त्याचबरोबर या यशस्वी विद्यार्थ्यांचा आणि त्यांच्या पाठीशी खंबीरपणे उभे राहिलेल्या त्यांच्या पालकांचाही विशेष सत्कार करण्यात आला.