‘सत्यापन ॲप’चा लाभ घ्या ः झालटे

‘सत्यापन ॲप’चा
लाभ घ्या ः झालटे
मालवण : केंद्र शासन पुरस्कृत इंदिरा गांधी राष्ट्रीय वृद्धापकाळ निवृत्तीवेतन योजना, इंदिरा गांधी राष्ट्रीय विधवा निवृत्ती वेतन योजना, इंदिरा गांधी राष्ट्रीय दिव्यांग निवृत्तीवेतन योजना या योजनेअंतर्गत लाभ घेत असलेल्या लाभार्थ्यांना हयात प्रमाणपत्र प्रमाणित करण्यासाठी ‘सत्यापन ॲप’ ही नवी सुविधा विकसित करण्यात आली आहे. या सुविधेचा लाभ लाभार्थ्यांनी घ्यावा, असे आवाहन तहसीलदार वर्षा झालटे यांनी केले आहे. केंद्र व राज्यामार्फत सामाजिक विशेष सहाय्य विभाग यांच्याकडून विविध योजनेंतर्गत समाजातील उपेक्षित निराधार व्यक्तींना उदरनिर्वाहासाठी प्रत्येक महिन्यात आर्थिक सहाय्य देण्यात येते. या योजनांच्या लाभार्थ्यांना हयात प्रमाणपत्र प्रमाणित करण्यासाठी ‘सत्यापन ॲप’ ही सुविधा विकसित केली आहे. लाभार्थ्यांनी मोबाईलवरून स्वतः, सेतू सुविधा केंद्र, महा ई-सेवा केंद्र, पोलिसपाटील, आशा वर्कर्स किंवा अंगणवाडी सेविकांमार्फत आधार प्रमाणिकरणाचा वापर करून हयात दाखला प्रमाणित करून घ्यावा, असे आवाहन तहसीलदार झालटे यांनी केले आहे.