शिष्यवृत्ती अर्ज तत्काळ निकाली लावा

शिष्यवृत्ती अर्ज तत्काळ निकाली लावा

प्रादेशिक उपायुक्त; ऑनलाईन बैठकीत महाविद्यालयांना सूचना

सकाळ वृत्तसेवा
सिंधुदुर्गनगरी, ता. २८ ः भारत सरकार मॅट्रिकोत्तर शिष्यवृत्ती योजना, शिक्षण शुल्क व परीक्षा शुल्क योजनेची मुंबई विभाग समाज कल्याणचे प्रादेशिक उपायुक्त बाळासाहेब सोळंकी यांच्या अध्यक्षतेखाली व समाज कल्याण सहायक आयुक्त संतोष चिकणे यांच्या उपस्थितीत जिल्ह्यातील सर्व महाविद्यालयांच्या प्राचार्यांची ऑनलाईनद्वारे बैठक झाली. या बैठकीत प्रादेशिक उपायुक्त सोळंकी यांनी २०२४-२५ मध्ये प्रवेश घेतलेल्या अनुसूचित जातीतील १०० टक्के विद्यार्थ्यांना योजनांचा लाभ मिळावा, यासाठी प्रलंबित अर्ज २९ जुलैपर्यंत निकाली काढण्याचे निर्देश संबंधित महाविद्यालयांना दिले.
महाविद्यालयातील प्रवेशित अनुसूचित जातीतील विद्यार्थ्यांकडून कोणत्याही प्रकारचे शुल्क आकारू नये. शिष्यवृत्ती शासनाकडून प्राप्त झाली नाही, या कारणास्तव कोणत्याही प्रकारची अनुसुचित जाती विद्यार्थ्यांची कागदपत्रे महाविद्यालयांनी अडवू नयेत. विद्यार्थी, पालक तसेच सामाजिक व राजकीय संघटना यांच्या तक्रारी आढळल्यास याबाबत महाविद्यालयास जबाबदार ठरवून संबंधित महाविद्यालयांवर नियमानुसार फौजदारी स्वरुपाची कार्यवाही करू, असेही त्यांनी सांगितले.
२०२५-२६ साठी मॅट्रिकोत्तर योजना व इतर शिष्यवृत्ती योजनेसाठी महाडीबीटी पोर्टलवर अर्ज भरण्याची प्रक्रिया सुरू झाली आहे. अर्जांची संख्या विचारात घेता फार कमी अर्ज महाविद्यालयांकडे प्राप्त होत असल्याने प्रत्येक महाविद्यालयाने अनुसूचित जातीतील प्रवेशित १०० टक्के विद्यार्थ्यांचे नवीन अर्ज व नूतनीकरण अर्ज तत्काळ भरून घेऊन मंजुरीसाठी सहायक आयुक्त, समाज कल्याण, सिंधुदुर्ग कार्यालयाकडे सादर करण्याचे आवाहनही श्री. सोळंकी यांनी यावेळी केले.