फुणगुस येथे रसायनाने भरलेला टँकर उलटला

८०४७२

फुणगूस येथे रसायनाचा टँकर उलटला
१७ पिंप गेली जंगलात ः चालकाला नडला गुगल मॅपचा आधार
सकाळ वृत्तसेवा
संगमेश्वर, ता. २८ ः गोव्याहून मुंबईच्या दिशेने जाताना गुगल मॅपद्वारे जवळच्या मार्गाने फुणगूसमार्गे निघालेला केमिकलने भरलेला टॅंकर उलटला. या अपघातात टँकरमधील रसायनाने भरलेले पिंप जंगलात वाहून गेल्याने मोठे नुकसान झाले आहे. उडी मारल्यामुळे चालकाचा जीव वाचला.
रंगासाठी लागणारी ४७ बॅरल घेऊन टँकर (जेजी ३७ बी २२६०) गोवा महामार्गावरून मुंबईकडे जात होता. निवळी येथे आल्यानंतर त्याने गुगल मॅपचा आधार घेतला. गुगल मॅपने फुणगूस आणि उक्षी मार्ग दाखवला; मात्र उक्षी मार्गावरील अवघड वळणामुळे त्याने जाकादेवी फुणगुसमार्गे संगमेश्वरला जाण्याचा निर्णय घेतला. फुणगूस येथे सकाळी नऊच्या दरम्यान आला असता अवघड वळणावर चालकाचा ताबा सुटल्याने टँकर उलटला. यामध्ये असलेले ४७ बॅरलपैकी ३० बॅरल शिल्लक राहिले आहेत. बाकीचे बॅरल जंगलात वाहून गेले आहेत. टँकरचेही मोठ्या प्रमाणात नुकसान झाले आहे. याची माहिती पोलिसपाटील यांनी संगमेश्वर पोलिस ठाण्याला दिली. पोलिस घटनास्थळी आले आणि पंचनामा केला.