''कोमसाप'' कुडाळ अध्यक्षपदी प्रा. वालावलकर

swt294.jpg
80754
कुडाळः कोमसाप तालुकाध्यक्षपदी प्रा. संतोष वालावलकर यांची निवड झाल्याबद्दल ज्येष्ठ लेखिका वृंदा कांबळी यांनी स्वागत केले. सोबत मंगेश मसके, विठ्ठल कदम, अनंत वैद्य, डॉ. दीपाली काजरेकर, स्नेहा फणसळकर, सुरेश पवार आदी. (छायाचित्र ः अजय सावंत)

‘कोमसाप’ कुडाळ अध्यक्षपदी प्रा. वालावलकर
बिनविरोध निवडः वार्षिक सर्वसाधारण सभेत नवी कार्यकारिणी जाहीर
सकाळ वृत्तसेवा
कुडाळ, ता. २९ः कोकण मराठी साहित्य परिषद कुडाळ शाखा अध्यक्षपदी संत राऊळ महाराज महाविद्यालयाचे प्रा. संतोष वालावलकर, कार्यवाहपदी सुरेश पवार यांची निवड करण्यात आली.
कोकण मराठी साहित्य परिषद कुडाळ शाखेची वार्षिक सर्वसाधारण सभा ज्येष्ठ लेखिका वृंदा कांबळी यांच्या अध्यक्षतेखाली जिल्हाध्यक्ष मंगेश मसके व निरीक्षक कवी विठ्ठल कदम यांच्या मार्गदर्शनाखाली येथील संत राऊळ महाराज महाविद्यालयाच्या सभागृहामध्ये झाली. यावेळी २०२५ ते २०२८ या तीन वर्षांच्या कालावधीसाठी नवीन कार्यकारिणीची बिनविरोध निवड करण्यात आली. यामध्ये अध्यक्ष प्रा. वालावलकर, उपाध्यक्ष प्रा. डॉ. दीपाली काजरेकर व स्नेहा फळसणकर, कार्यवाह पवार, सहकार्यवाह स्वाती सावंत, कोषाध्यक्ष गोविंद पवार, जिल्हा प्रतिनिधी मंगेश मसके, सदस्य म्हणून कवी अनंत वैद्य, वृंदा कांबळी, प्रा. अरुण मर्गज, संदीप साळसकर यांची निवड करण्यात आली. कोमसापचे कार्य सर्वांच्या सहकार्याने व सर्वांना विश्वासात घेऊन करणार असल्याचे नूतन अध्यक्ष प्रा. वालावलकर यांनी सांगितले. प्रा. वालावलकर हे संत राऊळ महाराज महाविद्यालयामध्ये मराठी विषयाचे अधिव्याख्याता व यशवंतराव चव्हाण मुक्त विद्यापीठाच्या कुडाळ अभ्यास केंद्राचे केंद्रसंयोजक या पदावर कार्यरत आहेत.
सौ. कांबळी यांनी लवकरच विविध समित्या गठित करण्यात येणार असल्याचे सांगितले. यावेळी विविध उपक्रमांविषयी चर्चा करण्यात आली. यावर्षीपासून ज्येष्ठ लेखिका कुमुद रेगे यांच्या स्मृतिप्रीत्यर्थ कुडाळ शाखेतर्फे त्यांच्या नावे पुरस्कार देण्यात येणार असल्याचे जाहीर केले. पिंगुळी उपसरपंचपदी निवड झाल्याबद्दल मंगेश मसके, बालसाहित्याचा शालेय अभ्यासक्रमात समावेश झाल्याबद्दल कवी विठ्ठल कदम यांचा कांबळी यांच्या हस्ते सत्कार करण्यात आला. विठ्ठल कदम यांनी विविध योजनांची माहिती देत विचार व्यक्त केले. स्नेहा फळसणकर यांनी आभार मानले.