संस्कारमय प्रबोधनामुळे जीवन परिपूर्ण

80756

संस्कारमय प्रबोधनामुळे जीवन परिपूर्ण
बन्सीधर राणेः कुडाळात जीवनविद्या मिशनतर्फे ‘कृतज्ञता दिन’
सकाळ वृत्तसेवा
कुडाळ, ता. २९ः जीवन विद्या मिशनचे प्रणेते सद्गुरू वामनराव पै यांचे विचार प्रत्येकाने आत्मसात करून जीवनाच्या प्रवाहात वाटचाल केली पाहिजे. जीवनात संस्कारमय, परिपूर्ण मार्गदर्शन करणारे माध्यम म्हणजे जीवन विद्या मिशन आहे, असे प्रतिपादन सद्गुरू वामनराव पै यांचे शिष्य बन्सीधर राणे यांनी गुरुपौर्णिमा कृतज्ञता दिन सोहळ्यात केले.
जीवनविद्या मिशन ज्ञानसाधना केंद्र, कुडाळतर्फे मिशनचे प्रणेते सद्गुरू वामनराव पै यांच्याप्रती कृतज्ञता तसेच मिशनचे आजीव विश्वस्त व ज्ञानगुरू प्रल्हाद पै यांच्या अमृत महोत्सवी जन्मदिनानिमित्त येथील महालक्ष्मी हॉलमध्ये गुरुपौर्णिमा (कृतज्ञता दिन) साजरा करण्यात आला. यावेळी जीवनविद्या मिशनचे नऊ वर्षे अध्यक्षपद भूषविलेले ज्येष्ठ प्रबोधक, मुंबई महानगरपालिकेतून डेप्युटी चीफ इंजिनिअर या पदावरून सेवानिवृत्त झालेले ज्येष्ठ प्रबोधक इन्सुली गावचे सुपुत्र शिवाजीराव पालव, कणकवली येथील प्रबोधक संदीप परब, मराठा क्लॉथ स्टोअरचे ज्येष्ठ नामधारक, उद्योजक अशोक परब, कुडाळ केंद्राचे अध्यक्ष मधुकर सावंत, प्रमोद चिंदरकर, निलांबरी पालव, महेश दळवी, शरद धुरी, शीतल कुडाळकर, आरती सामंत, राजू राणे, लवू पालव, डॉ. नीलेश अटक, अंकुश पालव आदींसह कुडाळ, सावंतवाडी, वेंगुर्ले, कणकवली परिसरातून जीवनविद्या मिशनचे नामधारक मोठ्या संख्येने उपस्थित होते.
कार्यक्रमाची सुरुवात हरिपाठ आणि नाम संकीर्तनाने झाली. त्यानंतर गुणवंत विद्यार्थ्यांचा कौतुक सोहळा व डॉ. नीलेश अटक यांचा प्रेरणादायी ‘सुखसंवाद’ झाला. प्रबोधक श्री. राणे यांनी ‘मज हृदयी सद्गुरू’ या विषयावर मार्गदर्शन करताना जीवनात सद्गुरुंचे महत्त्व काय, सद्गुरू कोणाला म्हणावे, सद्गुरू भाव म्हणजे काय आदी विषयांवर प्रबोधन केले.
नामधारक शीतल कुडाळकर यांनी सद्गुरू प्रल्हाद पै यांच्या अमृतमहोत्सवी वर्षाचे औचित्य साधून तालुक्यात, जिल्ह्यात विविध उपक्रम राबविले जाणार आहेत, अशी माहिती दिली. गुरुपौर्णिमेच्या निमित्ताने सद्गुरू वामनराव पै यांचे ग्रंथस्टॉल, सद्गुरुंचे चरित्र याची मांडणी केली होती. या गुरुपौर्णिमा सोहळ्याची भैरवीने सांगता करण्यात आली. निवेदन शीतल कुडाळकर आणि आरती सामंत यांनी केले. ज्ञानसाधना केंद्राचे कुडाळ अध्यक्ष मधुकर सावंत यांच्या अध्यक्षतेखाली कार्यक्रमाचे नियोजन करण्यात आले.