स्मार्ट मिटर विरोधात ग्रामस्थ आंदोलनाच्या तयारीत

स्मार्ट मीटरविरोधात ग्रामस्थ आक्रमक
कुंभारखाणी येथे आज बैठक; वीजबिलांची रक्कम वाढली
सकाळ वृत्तसेवा
सावर्डे, ता. २९ : महावितरण कंपनी स्मार्ट मीटरमुळे वीजबिले भरमसाठ येत असून, महावितरणकडून सुरक्षा अनामत रक्कमही वसूल केली जात आहे. या पार्श्वभूमीवर चर्चा करण्यासाठी कुंभारखाणी बुद्रुक (ता. संगमेश्वर) येथील ग्रामस्थांनी उद्या (ता. ३०) सकाळी १२ वाजता ग्रामदेवता मंदिरात बैठक आयोजित केली आहे. या बैठकीत आंदोलनाची दिशा ठरवण्यात येणार आहे.
महावितरणकडून गावागावात आणि आसपासच्या परिसरात स्मार्ट मीटरची जोडणी केली जात आहे. जोडणी करताना परवानगी घेतलेली नाही, याबाबत पोलिस ठाणे आणि महावितरण कार्यालयात तक्रारही दिलेली आहे. तरीही स्मार्ट मीटर बसवणे सुरूच आहे. त्यामुळे कुंभारखाणी येथे होणाऱ्या बैठकीत सविस्तर चर्चा केली जाणार आहे. महावितरणने वीजग्राहकांची परवानगी न घेता जुने मीटर काढून त्या ठिकाणी नवीन स्मार्ट मीटर बसवले आहेत. ग्रामीण भागातील ग्राहकांनी या स्मार्ट मीटरला विरोध करायला सुरुवात केली असली तरीही कंपनीचे कर्मचारी चोरून, लपवून किंवा चुकीची माहिती देऊन हे मीटर लावत आहेत. या बेकायदेशीर प्रक्रियेबाबत ग्रामस्थांच्या मनात अनेक गंभीर प्रश्न आणि चिंता निर्माण झाल्या आहेत. हे मीटर ज्यांची घरे बंद आहेत, ज्यांच्या घराच्या आवाराला कुलूप आहे, ज्यांच्या घरांचे गेट बंद आहेत अशाच घरातील मीटर बदलले जात आहेत. याबाबत संबंधित महावितरणकडून कोणतीही पूर्वसूचना देण्यात येत नाही. कोणताही शासकीय आदेश नाही, मीटरधारकांची कोणतीही परवानगी नाही. असे असताना घराच्या आवारात बेकायदेशीररीत्या घुसून जुने मीटर काढून त्या जागी दुसरेच मीटर लावण्यात आले आहेत. या मीटरमधून अधिक वीजबिले येत आहेत, हे अन्यायकारक आहे. यामध्ये ग्रामस्थांचा कमालीचा असंतोष वाढला आहे. यावर कोणताही राजकीय पक्ष आवाज उठवत नाही. त्यामुळे ग्रामस्थांमध्ये नाराजी व्यक्त केली जात आहे. अन्यायाविरोधात आवाज उठवण्यासाठी बैठक आयोजित केली असल्याचे विकास सुर्वे, संदीप सुर्वे व सतीश सुर्वे यांनी सांगितले.