‘रवळनाथ’ संस्थेतर्फे तरुणाला शस्त्रकियेसाठी आर्थिक मदत

80981

‘रवळनाथ’तर्फे तरुणाला
शस्त्रकियेसाठी आर्थिक मदत

सकाळ वृत्तसेवा
कुडाळ, ता. ३० ः तालुक्यातील पाट येथील २२ वर्षांच्या कुलदीप नेरुरकर या महाविद्यालयीन तरुणावर अपेंडिक्सची शस्त्रक्रिया झाली आहे. त्याची आर्थिक परिस्थिती बेताची असल्यामुळे उपचारांसाठी आर्थिक मदतीचे आवाहन केले होते. त्यानुसार श्री रवळनाथ को-ऑप. हाऊसिंग फायनान्स सोसायटीचे संस्थापक- अध्यक्ष एम. एल. चौगुले यांनी चौकशी करून तातडीने त्यांना डॉ. ज्ञानेश्वर मुळे फाउंडेशन संचलित ‘चांगुलपणाची चळवळ’ उपक्रमांतर्गत ‘रवळनाथ’तर्फे १५ हजारांची मदत केली. ही मदत पिंगुळी येथे देण्यात आली.
कुलदीप हा आंब्याच्या बागेत काम करून आपल्या वडिलांना हातभार लावतो. यशवंतराव चव्हाण मुक्त विद्यापीठाच्या माध्यमातून तो महाविद्यालयीन शिक्षण घेत आहे; मात्र अचानक आलेल्या आजारपणामुळे नेरुरकर कुटुंबीयांसमोर आर्थिक समस्या उभी राहिली. कुलदीपच्या शस्त्रक्रियेसाठी लागणारा खर्च त्यांच्यासाठी न पेलावणारा आहे. त्यांची आर्थिक परिस्थिती बेताची असल्यामुळे वैद्यकीय उपचारांसाठी नेरुरकर कुटुंबीयांनी मदतीचे आवाहन केले होते. यासंदर्भात तातडीने माहिती घेऊन ही मदत देण्यात आली. श्री. चौगुले यांच्या हस्ते सत्यवान नेरुरकर यांच्याकडे १५ हजार रुपयांची मदत सुपूर्द करण्यात आली. या मदतीबद्दल त्यांनी कृतज्ञता व्यक्त केली. ‘रवळनाथ’चे संचालक प्रा. व्ही. के. मायदेव, कुडाळ शाखेचे चेअरमन अशोक येजरे, शाखा सल्लागार प्रा. मनोहर गुरबे, शाखाधिकारी विक्रम जांभेकर आदी उपस्थित होते.