नांदगावमध्ये भरला कलाकारांचा मेळा

80993

नांदगावमध्ये भरला कलाकारांचा मेळा
कला महोत्सवास प्रतिसादः मोरजकर ट्रस्टचा श्रावण सोमवारनिमित्त उपक्रम
सकाळ वृत्तसेवा
नांदगाव, ता. ३०ः येथील किशोर मोरजकर चॅरिटेबल ट्रस्टच्या वतीने पहिल्या श्रावण सोमवार निमित्त (ता. २८) आयोजित केलेल्या कला महोत्सवाला कलाकारांचा उत्स्फूर्त प्रतिसाद मिळाला. भजनी बुवा, मूर्तिकार, नाट्य कलाकार यांनी सहभागी होत आपली कला सादर केली.
या महोत्सवाला कलाकार मानधन समिती जिल्हाध्यक्ष बुवा संतोष कानडे यांची विशेष उपस्थिती लाभली.
व्यासपीठावर नांदगाव सरपंच भाई मोरजकर, नांदगाव पंचायत समिती माजी सदस्या हर्षदा वाळके, किशोर मोरजकर, चॅरिटेबल ट्रस्टचे अध्यक्ष ऋषिकेश मोरजकर, उपाध्यक्ष भाई मोरये, संतोष मिराशी बुवा, माजी उपसरपंच नीरज मोरये, कासार्डे बिट अंमलदार चंद्रकांत झोरे, स्वप्नील जाधव, हनुमंत वाळके, रवींद्र तेली, ग्रामपंचायत सदस्य बुवा शंकर मोरये, बबन मोरये, मारुती मोरये, मंगेश मोरये, सदानंद बिडये, ज्येष्ठ बुवा आत्माराम घाडी, माजी तंटामुक्त समिती अध्यक्ष राजू तांबे, कमलाकर पाटील, राजू तांबे, भूपेश मोरजकर, नीलेश मोरये आदी उपस्थित होते.
रसिक प्रेक्षकांची लक्षणीय उपस्थिती होती. सर्व सहभागी कलाकारांना सहभाग प्रमाणपत्र देऊन मान्यवरांच्या हस्ते गौरविण्यात आले. श्री. संतोष कानडे यांनी कलाकारांना व्यासपीठ मिळवून देण्याचा उपक्रम राबविल्याबाबत मोरजकर ट्रस्टचे कौतुक केले. (कै.) किशोर मोरजकर यांचे ११ वर्षांपूर्वी प्रस्ताव मंजूर न झाल्याने जी परवड झाली, ती उणीव भरून काढण्यासाठी त्यांच्या स्मरण म्हणून एका ज्येष्ठ कलाकाराचे नाव ट्रस्टने सुचवावे, तो प्रस्ताव याच वर्षात मंजूर करण्यासाठी प्रयत्न करू, अशी ग्वाही त्यांनी दिली. किशोर मोरजकर यांनी २००९ मध्ये कलाकार मानधनासाठी अर्ज दाखल केला होता; पण मंजुरीपूर्वी २०१४ मध्ये त्यांचे निधन झाले आणि वर्षभराने त्यांचे नाव पेन्शन यादीत जाहीर करण्यात आले. अशी वेळ अन्य कुणावर येऊ नये, यासाठी या कला महोत्सवाद्वारे सहभागी सर्व कलाकारांना प्रमाणपत्र देण्यात येत असल्याचे ट्रस्टचे अध्यक्ष ऋषिकेश मोरजकर यांनी सांगितले. हे प्रमाणपत्र पेन्शन योजनेसाठी उपयुक्त ठरणार असल्याचे ते म्हणाले. या कला महोत्सवामध्ये परिसरातील भजनी बुवा, नाट्य कलाकार यांनी सहभागी होत कला सादर केली. बुवा संतोष कानडे, संतोष मिराशी यांनीही लोकआग्रस्तव गौळण सादर केली.