लांजा विकास आराखड्याला स्थगिती मिळेल

लांजा विकास आराखड्याला स्थगिती मिळेल
भाजपचा विश्वास; मंत्री राणेंच्या आश्वासनामुळे बळ
सकाळ वृत्तसेवा
लांजा, ता. ३०ः राज्याचे मत्स्य आणि बंदरेविकास मंत्री नीतेश राणे यांच्या ठोस आश्वासनामुळे लांजा नगरपंचायतीच्या प्रारूप विकास आराखड्याला शंभर टक्के स्थगिती मिळेल आणि हा प्रश्न मार्गी लागेल, असा ठाम विश्वास लांजा तालुका भाजपच्यावतीने आयोजित पत्रकार परिषदेत व्यक्त करण्यात आला.
लांजा तालुका भाजपच्यावतीने मंगळवारी (ता. २९) पक्ष कार्यालयात पत्रकार परिषद घेण्यात आली. या वेळी भाजप तालुकाध्यक्ष शैलेश खामकर, विराज हरमले उपस्थित होते. लांजा शहराच्या प्रारूप विकास आराखड्याबाबत माहिती देताना खामकर म्हणाले, सर्वच दृष्टीने त्रासदायक ठरणारा विकास आराखडा लोकांना नको असल्याने ग्रामस्थांच्या या भूमिकेला भाजपचे संपूर्ण समर्थन आहे. आम्ही सर्व भाजप पदाधिकारी लांजा कुवे येथील लोकांसमवेत असून, या विकास आराखड्याला स्थगिती मिळावी म्हणून आम्ही सर्व प्रमुख पदाधिकारी गेल्या दोन महिन्यांपासून सातत्याने पक्षस्तरावर पाठपुरावा करत आहोत.
या आराखड्याला स्थगिती मिळण्याबाबत पक्षाच्या वरिष्ठ पातळीवर बोलणे झाले आहे. मंत्री नीतेश राणे यांच्या कानावर या साऱ्या बाबी घातलेल्या आहेत. त्यांनीदेखील लोकांच्या भूमिकेला पाठिंबा दिला असून, मुख्यमंत्री देवेंद्र फडणवीस यांच्याशी चर्चा करून हा प्रश्न मार्गी लावू, असे आश्वासन दिल्याचे खामकर यांनी सांगितले.