देवगड-नांदगाव रस्त्याला झुडपांचा वेढा

81030

झुडपांचा वेढा; चालकांना पुढचं दिसेना

देवगड-नांदगाव रस्ता; अपघाताची शक्यता; गणेशोत्सवापूर्वी दखल घेण्याची मागणी

सकाळ वृत्तसेवा
देवगड, ता. ३० ः देवगड नांदगाव या मुख्य रस्त्याकडेला पावसामुळे झाडीझुडपे वाढली आहेत. रस्त्यालगत मोठ्या प्रमाणात गवतही वाढले असल्यामुळे वाहने हाकताना अडचणीचे होत आहे. झाडींमुळे समोरून येणारे वाहन दिसत नसल्याने अपघाताला आमंत्रण मिळण्याची शक्यता आहे. याकडे संबंधित विभागाने लक्ष देण्याची मागणी होत आहे. दरम्यान, गणेशोत्सव तोंडावर आल्याने रस्त्याकडेची झाडी तोडणे आवश्यक असल्याचे मत व्यक्त करण्यात येत आहे.
पावसामुळे देवगड-नांदगाव या मुख्य मार्गासह ग्रामीण भागातील रस्त्याकडेला मोठी झाडी वाढली आहे. वाढलेली झुडपे रस्त्यावर आली असल्याने समोरून येणारी वाहने चटकन् दिसत नाहीत. त्यामुळे वाहन चालविताना काळजी घ्यावी लागत आहे. रस्त्याकडेला रानटी झुडपे, वेली वाढलेल्या असल्याने दुचाकीस्वारांना वाहन चालवताना दक्षता घ्यावी लागते. रस्त्याकडेला गवत तसेच झुडपे वाढलेली असल्याने काहीवेळा गुरे तसेच सरपटणारी जनावरे रस्त्यावर येत असल्याने सावधानता बाळगावी लागते. रस्त्याकडेला गवत वाढलेले असल्याने समोरच्या वाहनांना बाजू देताना रस्त्याचा पटकन अंदाज येत नाही. अशावेळी अपघात होण्याचाही संभव असतो.
-------
दुचाकीचालकांची तारांबळ
देवगड नांदगाव या मुख्य रस्त्यावर दाभोळ तिठा परिसरात अशीच झाडी वाढली आहे. वाढलेली झाडी रस्त्यावर झुकल्याने वाहन चालकांना मोठी अडचण भासते. समोरून येणाऱ्या वाहनाला बाजू देताना त्याचा अधिक त्रास सहन करावा लागतो. विशेषतः दुचाकीस्वारांची मोठी तारांबळ उडते. समोरचा रस्ता दिसत नसल्याने वाहने हाकताना काळजी घ्यावी लागते. आता गणेशोत्सवात चाकरमानी खासगी वाहने घेऊन गावी आल्यावर वाहनांच्या वर्दळीत मोठी वाढ होऊ शकते. अशावेळी रस्त्याकडेची झाडी कमी करण्याची आवश्यकता बनली आहे. याकडे बांधकाम विभागाने तातडीने लक्ष देण्याची वाहनचालकांची मागणी आहे.