भाषा गुणवत्ता पुरस्कार सोहळा

मराठी भाषा गुणवत्ता पुरस्कार सोहळा
सकाळ वृत्तसेवा
रत्नागिरी, ता. ३१ : पटवर्धन हायस्कूलच्या नूतन वास्तूमध्ये रत्नागिरीतील पत्रकार (कै.) शेखरकुमार भुते यांच्या स्मरणार्थ दहावीच्या परीक्षेत मराठीमध्ये सर्वाधिक गुण मिळवणाऱ्या विद्यार्थ्यांचा सत्कार सोहळा झाला.
कार्यक्रमाचे आयोजन पटवर्धन हायस्कूल माजी विद्यार्थी सभा, भारत शिक्षण मंडळ व मरिन सिंडिकेट यांच्या सहकार्याने केले. पटवर्धन हायस्कूलमधील शाल्मली रायंगणकर, पूर्वा माईणकर आणि श्रेया मुद्गल या तिघींनीही मराठीत सर्वाधिक ९७ गुण मिळवल्यामुळे त्यांना मान्यवरांच्या उपस्थितीत सन्मानित करण्यात आले. प्रत्येकी दोन हजार रुपये असे या पुरस्काराचे स्वरूप होते. या वेळी मराठीचे शिक्षक कैलास वाडकर यांचा पुष्पगुच्छ देऊन सत्कार करण्यात आला. कॅप्टन दिलीप भाटकर यांच्या मरिन सिंडिकेट लि. कंपनीच्यावतीने दरवर्षी हा पुरस्कार दिला जाणार आहे. या बक्षीस वितरण सोहळ्यासाठी माजी विद्यार्थी व जिल्हा परिषदेचे माजी राजाभाऊ लिमये, डॉ. दिलीप नागवेकर, डॉ. चंद्रशेखर केळकर, दादा कदम, धरमसीभाई चौहान, कॅप्टन दिलीप भाटकर, विनायक हातखंबकर, संतोष कुष्टे, संजय शिवलकर, सादिक मुल्ला व कार्यकारिणी सदस्य, शाळेच्या मुख्याध्यापिका जानकी घाटविलकर आणि (कै.) भुते यांचे बंधू, पुतणे व मित्रपरिवार उपस्थित होता.