पणदूर येथे आज कर्करोग चिकित्सा

पणदूर येथे आज
कर्करोग चिकित्सा
कुडाळः मोबाईल कॅन्सर निदान व्हॅन उद्या (ता. १) आयुष्मान आरोग्य मंदिर (प्राथमिक आरोग्य केंद्र) पणदूर येथे दाखल होणार आहे. सकाळी ९ ते दुपारी २ या वेळेत ही व्हॅन उपलब्ध असणार आहे. या व्हॅनमध्ये स्त्रीरोगतज्ज्ञ, दंत शल्यचिकित्सक उपलब्ध असून, यावेळी मोफत कर्करोग तपासणी व जनजागृती शिबिर आयोजित करण्यात आले आहे. यात मुखाचा कर्करोग, स्तनाचा कर्करोग व गर्भाशयाच्या मुखाचा कर्करोग निदान करण्यासाठी तपासणी करण्यात येणार आहे. तसेच मोफत रक्त तपासणी, रक्तदाब, ब्लडशुगर तपासणी, मोफत ईसीजी तपासणी केली जाणार आहे. तपासणीसाठी येताना नागरिकांनी आधार कार्ड, आभा कार्ड (काढलेले असल्यास), आधार लिंक असलेला मोबाईल घेऊन यावे. पणदूर पंचक्रोशीसह परिसरातील नागरिक तसेच लक्षणे असणाऱ्या रुग्णांनी याचा लाभ घ्यावा, असे आवाहन पणदूर प्राथमिक आरोग्य केंद्राच्या वैद्यकीय अधिकारी डॉ. कविता पराडकर यांनी केले आहे.
.........................
पाट येथे रविवारी
रक्तदान शिबिर
म्हापणः केंद्रशाळा पाट वरचावाडा येथे रविवारी (ता. ३) सकाळी ९ ते दुपारी १ वाजेपर्यंत सिंधू संजीवनी ग्रुपच्या वतीने रक्तदान शिबिराचे आयोजन करण्यात आले आहे. जास्तीत जास्त रक्तदात्यांनी या रक्तदान शिबिरात सहभागी होऊन रक्तदान करावे, असे आवाहन सिंधू संजीवनी ग्रुपच्या वतीने करण्यात येत आहे.
........................
मळगाव वाचनालयात
मंगळवारी ‘काव्यांजली’
सावंतवाडीः मळगाव येथील (कै.) प्रा. उदय रमाकांत खानोलकर वाचनमंदिराच्या रौप्य महोत्सवानिमित्त विविध साहित्यिक आणि सांस्कृतिक कार्यक्रमांची रेलचेल सुरू आहे. याचाच एक भाग म्हणून याही वर्षी ग्रंथालयाच्या रमाकांत सूर्याजी खानोलकर सभागृहात मंगळवारी (ता. ५) सायंकाळी ४ वाजता ‘काव्यांजली’ या स्वरचित कविता वाचन व गायन कार्यक्रमाचे विशेष आयोजन केले आहे. नवोदित कवींना प्रोत्साहन आणि व्यासपीठ देण्याच्या उद्देशाने या वाचनालयाने या कार्यक्रमाचे आयोजन केले आहे. कार्यक्रमाला कोकण मराठी साहित्य परिषदेचे सावंतवाडी तालुकाध्यक्ष कवी दीपक पटेकर यांची प्रमुख उपस्थिती असणार आहे. त्यांच्या उपस्थितीने कार्यक्रमाला निश्चितच एक वेगळी उंची प्राप्त होईल, अशी अपेक्षा व्यक्त होत आहे. कवी आणि साहित्यप्रेमींसाठी ही एक सुवर्णसंधी असून, त्यांना आपल्या स्वरचित कविता सादर करण्याची आणि अनुभवी कवींचे मार्गदर्शन घेण्याची संधी मिळणार आहे. या ‘काव्यांजली’ सोहळ्यात स्थानिक प्रतिभावंत कवींना आपले विचार आणि भावना काव्यात्मक रुपात मांडता येणार आहेत. सर्व साहित्य रसिक, कवी आणि नागरिकांनी या कार्यक्रमाला उपस्थित राहून या काव्यमैफलीचा लाभ घ्यावा, असे आवाहन वाचनालयातर्फे केले आहे.