कलमठचा वीजेचा फिडर वेगळा करण्याची मागणी

कलमठचा वीजेचा फिडर
वेगळा करण्याची मागणी
शिवसेनेचा १५ ऑगस्टला उपोषण इशारा
कणकवली,ता. ३१ ः कलमठ गावात वीजेची समस्या आहे. सातत्याने वीजेचा लपंडाव सुरू असतो. त्यामुळे कलमठ वीजेचा फिडर वेगळा न केल्यास १५ ऑगस्ट रोजी उपोषण केले जाईल, असा इशारा शिवसेना तालुका संघटक राज राठोड यांनी महावितरणचे कार्यकारी अभियंता कणकवली यांना एक निवेदनातून दिला आहे.
निवेदनात म्हटले आहे की, कित्येक वर्ष शिवसेनेच्या वतीने कलमठच्या वीज समस्येबाबत विभागाकडे मागणी केली आहे. या प्रश्‍नी आवाज उठविलेला आहे. कलमठ गावचा विस्तार वाढत आहे. त्यामुळे गावामध्ये आता विजेच्या समस्या मोठ्या प्रमाणात वाढत आहेत. दिवसाआड वीज पुरवठा खंडीत होत असतो. हे गेली कित्येक वर्षे चालू आहे. कलमठ गाव हे खारेपाटण फिडरला जोडलेले असल्यामुळे या फिडरवरील कुठल्याही गावात समस्या झाल्यास कलमठ मधील विजेवर याचा सतत परिणाम होत असतो. त्यामुळे खारेपाटण फिडरचे दोन भाग करुन कलमठ फिडर वेगळा केल्यास दोन्ही फिडरला सोयीचे होईल. त्यामुळे यावर विचार करुन लवकरात लवकर कार्यवाही करावी. अन्यथा शिवसेना कलमठ आणि ग्रामस्थ यांच्यामार्फत १५ ऑगस्ट रोजी सकाळी ७ वाजता आम्ही आपल्या कार्यालयासमोर उपोषणास बसणार आहोत असा इशारा देण्यात आला आहे.