केंद्रीय समितीकडून तालुक्यातील ग्रामपंचायतींचा आढावा

- rat३१p४२.jpg-
२५N८१२९४
रत्नागिरी- खानू ग्रामस्थांशी संवाद साधताना केंद्र शासनाचे पथक.

केंद्रीय समितीकडून ग्रामपंचायतींचा आढावा
ग्रामस्थांशी साधला संवाद ; योजनांची घेतली माहिती
सकाळ वृत्तसेवा
रत्नागिरी, ता. ३१ : केंद्र शासनाच्या योजना ग्रामीण भागातील तळागाळातील लोकांपर्यंत पोहचतात की नाही, याची तपासणी केंद्र शासनाकडून सुरू झाली आहे. केंद्राचे पथक रत्नागिरी जिल्ह्यात दाखल झाले असून दापोली, चिपळूण पाठोपाठ रत्नागिरी तालुक्यातील काही गावांमध्ये पथकाद्वारे तपासणी सुरू झाली आहे. या वेळी ग्रामीण भागातील लोकांशी संवाद साधून पथकातील अधिकारी विकासकामांचा आढावा घेत आहेत.
केंद्र शासनाच्या ग्रामीण विकास मंत्रालयामार्फत ग्रामपंचायत पातळीवर कृषी, जलसंधारण, घरकूल बांधणे यांसह अनेक योजना राबवल्या जात आहेत. या योजनांचे मूल्यांकन केंद्रीय समितीमार्फत केले जाणार आहे. केंद्रीय समितीचे प्रमुख धर्मेश ग्यानी आणि त्यांच्या सहकाऱ्यांनी ग्रामीण भागात राबवल्या जाणाऱ्या प्रत्येक योजनांची गावपातळीवर जाऊन पाहणी करण्यात सुरुवात केली आहे. योजना योग्यप्रकारे राबवल्या जात आहेत की नाहीत, काही त्रुटी आहेत का याची माहिती ते घेत आहेत. घरकुले बांधली जात आहेत की नाही याचीही प्रत्यक्ष पाहणी ते पथक करीत आहे. दापोली व चिपळूणमधील ग्रामपंचायतींना भेटी दिल्यानंतर हे केंद्रीय पथक रत्नागिरी तालुक्यातील ग्रामपंचायतींचा आढावा घेत आहे.
रत्नागिरी तालुक्यातील धामणसे या ग्रामपंचायतीला पथकाने भेट दिली. येथील कामांची माहितीही त्यांनी घेतली. गुरूवारी (ता. ३१) खानू येथील ग्रामपंचायतीला या पथकाने भेट दिली. या वेळी या पथकाने घरकूल, गोठा, गांडूळखत युनिट, महिला बचतगटांचे काजू युनिट यांची पाहणी केली. तसेच त्यांनी कृषी, जलसंधारण व फळबाग लागवडीचीही माहिती घेतली.
---
चौकट
खानूतील कामकाजाबाबत समाधानी
केंद्रीय योजनांचा लाभ घेणाऱ्‍या विविध ग्रामस्थांशी केंद्रीय पथकप्रमुख धर्मेश ग्यानी यांनी संवाद साधला. या वेळी रत्नागिरी पंचायत समितीचे गटविकास अधिकारी चेतन शेळके उपस्थित होते. या पथकाने ग्रामसेवक उमेश साळवी यांच्याकडून माहिती घेतली. या पथकाने खानूमध्ये झालेल्या कामकाजाबाबत समाधान व्यक्त केले. उद्या (ता. १) हे पथक मावळंगे गावाला भेट देणार आहे.