कौशल्य विकासाने महिला आत्मनिर्भर

81687

कौशल्य विकासाने महिला आत्मनिर्भर

सुधीर पालव ः कणकवलीत ड्रेस मेकर प्रशिक्षण

सकाळ वृत्तसेवा
ओरोस, ता. २ ः ‘‘ड्रेस मेकर प्रशिक्षण हे आताच्या स्पर्धात्मक युगात आवश्‍यक बाब बनली आहे. जनशिक्षण संस्थान, सिंधुदुर्गमार्फत यामध्ये अधिकाधिक महिला प्रशिक्षण घेण्यासाठी पुढे येत आहेत. जनशिक्षण संस्थान, सिंधुदुर्गच्या मागील २५ वर्षांमधील प्रशिक्षणामध्ये ८५ टक्के महिला वर्गाचा समावेश आहे. भारत सरकारच्या कौशल्य विकास व उद्योजकता मंत्रालयाचा उद्देश महिलांना आत्मनिर्भर करण्याचा आहे. यासाठी जनशिक्षण संस्थान, सिंधुदुर्ग कटिबद्ध आहे,’’ असे प्रतिपादन संस्थेचे सचिव सुधीर पालव यांनी केले.
भारत सरकारच्या कौशल्य विकास व उद्योजकता मंत्रालयांतर्गत जनशिक्षण संस्थान सिंधुदुर्ग आयोजित कणकवली तालुक्यातील तेलीआळी येथील विस्तार केंद्रात ड्रेस मेकर प्रशिक्षण वर्गाचे नुकतेच उद्‍घाटन श्री. पालव यांच्या उपस्थितीत झाले. त्या वेळी ते बोलत होते. यावेळी सहाय्यक कार्यक्रम अधिकारी रमेश खरात, प्रशिक्षक साक्षी दळवी यांच्यासह २० प्रशिक्षणार्थी उपस्थित होते. यावेळी जनशिक्षण संस्थान, सिंधुदुर्गचे सहाय्यक कार्यक्रम अधिकारी श्री. खरात यांनी उपस्थितांना प्रशिक्षणाची माहिती दिली. यावेळी श्री. पालव यांनी प्रशिक्षणार्थी महिलांना, शिवणकला प्रशिक्षण यशस्वीरीत्या पूर्ण करून प्रमाणपत्र मिळवा. यापुढे शिवणकलेतील अत्याधुनिक प्रशिक्षणाची आवश्‍यकता भासल्यास जनशिक्षण संस्थान सिंधुदुर्ग नक्कीच पुढाकार घेईल, असे यावेळी आश्र्वासित केले.