बिबट्याच्या हल्ल्यातून मांजरीला वाचवले

बिबट्याच्या तावडीतून मांजरीला वाचवले
संगमेश्वरातील घटना ; नावडीतील महिलेचे धाडस
सकाळ वृत्तसेवा
संगमेश्वर, ता. २ ः नावडी बाजारपेठ परिसरात रात्री एक धक्कादायक घटना घडली. सरिता शास्त्री यांच्या पाळीव मांजरावर अचानक बिबट्याने हल्ला चढवला; मात्र, अपत्यवत प्रेमाने आपल्या मांजरीच्या रक्षणासाठी त्यांनी धाडस दाखवत बिबट्याला थेट परत पळवून लावले. ही घटना रात्री उशिरा घडली. परिसरात रस्त्याच्या बाजूला बल्बचा अत्यल्प उजेड होता आणि अंधार दाटून आला होता. त्याच वेळी झाडीतून अचानक बिबट्या बाहेर पडला आणि त्याने मांजरीवर झडप घालण्याचा प्रयत्न केला. प्रसंगावधान राखत शास्त्री यांनी आवाज करत झाडाच्या फांद्या आणि दगड टाकून बिबट्याला पिटाळले आणि आपल्या मांजरीचे प्राण वाचवले. या घटनेमुळे परिसरात भीतीचे वातावरण निर्माण झाले असून, नागरिकांनी लवकरात लवकर या ठिकाणी योग्य प्रकाशयोजना करण्याची जोरदार मागणी केली आहे. नावडी बाजारपेठेतील नागरिकांनी संबंधित वनविभाग आणि ग्रामपंचायतीकडे सुरक्षा उपाययोजनांची मागणी केली असून, महामार्गालगतच्या झाडाझुडपांची छाटणी आणि लाईट बसवणे ही काळाची गरज असल्याचे मत व्यक्त केले आहे.