लोकमान्य टिळकांचा वैचारिक वारसा जपा

81735
लोकमान्य टिळकांचा वैचारिक वारसा जपा

प्रा. प्रथमेश कसबे ः बांदा महाविद्यालयात टिळक, अण्णा भाऊ साठेंना वंदन

सकाळ वृत्तसेवा
बांदा, ता. २ ः लोकमान्य टिळकांचा वैचारिक वारसा जतन करणे हीच त्यांना खरी आदरांजली ठरेल. समाजात लोकमान्य टिळकांचे वैचारिक वारसदार खूप होते व सद्य:स्थितीत आहेत. बालपणापासून झालेल्या आध्यात्मिक, बौद्धिक, वैचारिक संस्कारांनी टिळकांचे व्यक्तिमत्त्व कणखर बनले. स्वातंत्र चळवळीत अग्रणी शिलेदार म्हणून त्यांनी केलेले कार्य अजरामर आहे. अनेक परखड लेखांच्या माध्यमातून तत्कालीन समाज व्यवस्थेला वैचारिक वारसा त्यांनी दिला. आपल्या विचारांशी ठाम राहून स्वातंत्र्यलढा सक्षम करण्यात टिळकांचा सिंहाचा वाटा आहे, असे प्रतिपादन राज्यशास्त्र विभागाचे प्रा. प्रथमेश कसबे यांनी येथे केले.
येथील गोगटे-वाळके महाविद्यालयाच्या सांस्कृतिक व ग्रंथालय विभागातर्फे लोकमान्य पुण्यतिथी व साहित्यरत्न अण्णा भाऊ साठे जयंती असा संयुक्त कार्यक्रम आयोजित करण्यात आला. त्याप्रसंगी प्रमुख वक्ते म्हणून प्रा. कसबे बोलत होते. कार्यक्रमाचे अध्यक्ष महाविद्यालयाचे प्राचार्य डॉ. गोविंद काजरेकर होते.
अध्यक्ष प्रा. काजरेकर म्हणाले, ‘‘लोकमान्य टिळक व साहित्यरत्न अण्णा भाऊ साठे ही दोन महान व्यक्तिमत्त्वे समाजाला वैचारिक योगदान देणारी होती. लोकमान्य टिळकांनी आपल्या हयातीत समाजाभिमुख उपक्रम हाती घेतले. तत्त्वनिष्ठ जीवनप्रणालीच्या माध्यमातून स्वातंत्र्य चळवळीत त्यांचे योगदान महत्त्वपूर्ण आहे. तसेच साहित्यरत्न अण्णा भाऊ साठे यांनी पददलित, उपेक्षित समाजाचा आवाज आपल्या साहित्यातून मांडला. मानव केंद्रित साहित्य जाणिवा हे त्यांच्या साहित्याचे मर्म होते. वास्तववादी व संघर्षमय नायक, नायिका या त्यांच्या साहित्यात विखुरलेल्या आहेत. या दोन महान विचारवंतांनी आपापल्या क्षेत्रांत वैचारिक क्रांती केली. समाज परिवर्तनात या दोघांचे योगदान अतुलनीय आहे.’’ यावेळी आकांक्षा सावंत या विद्यार्थिनीने विचार व्यक्त केले. सांस्कृतिक विभागप्रमुख प्रा. डॉ. एन. डी. कार्वेकर यांनी प्रास्ताविक केले. प्रा. डॉ. आर. एस. गावडे यांनी सूत्रसंचालन केले. प्रा. डॉ. अनिल शिर्के यांनी आभार मानले.