‘रेड सॉईल स्टोरी’च्या शिरीष गवस यांचे निधन

‘रेड सॉईल स्टोरी’च्या
शिरीष गवस यांचे निधन

सकाळ वृत्तसेवा
दोडामार्ग, ता. २ : युट्युबच्या दुनियेतील रील्स स्टार, तालुक्यातील सासोली पाटये पुनर्वसन येथील रहिवाशी व निवृत्त नायब तहसीलदार सत्यवान गवस यांचा मुलगा शिरीष सत्यवान गवस (वय ३३) याचे काल (ता. १) अल्पशा आजराने निधन झाले. ‘रेड सॉईल स्टोरी’ या नावाने सोशल मीडियावर रील्स करून ते ‘रील्स कपल’ म्हणून प्रसिद्ध होते. त्यांच्या अचानक जाण्याने सर्वांनाचा एकच धक्का बसला.
रील्स सेलिब्रेटी म्हणून केवळ दोडामार्ग, सिंधुदुर्गच नव्हे तर, सगळीकडे प्रसिद्ध असलेल्या शिरीष यांच्या अचानक जाण्याने त्यांचा मित्र परिवार तसेच सोशल मीडियावरील त्यांच्या चाहत्यांना धक्का बसला आहे.
शिरीष यांचे वडील महसूल विभागात कामाला होते. प्रथम देवगड येथे व नंतर कणकवली येथे तहसील कार्यालयात कामाला असल्याने ते तिकडे स्थायिक झाले होते. शिरीषही त्यांच्याबरोबर कणकवली येथे राहत होता. मध्यंतरी कोरोनाच्या काळात ते आपल्या मूळ गावी सासोली पाटये येथे राहण्यासाठी आले होते. त्यावेळी त्यांच्या वडिलांची दोडामार्ग तहसील कार्यालय येथे बदली झाली. शिऱीष नोकरीनिमित्त बाहेर होते. त्या दरम्यान त्यांचे लग्न झाले. पुढे गावी काहीतरी करायचे, असे ठऱवून कोरोनाच्या काळात ते सासोलीत परतले. या दांपत्याने सोशल मीडियावर ''रेड सॉईल स्टोरीस'' या नावाने युट्युब चॅनल काढून रील्स करण्यास सुरुवात केली. यात ते बरेच लोकप्रिय झाले. या दांपत्याने कोकणातील मूळ संस्कृती मांडणारे अनेक व्हिडिओ केले. त्यांनी घरी स्टुडिओ उभारला होता.
ते गेले काही दिवस आजारी होते. त्यांच्यावर उपचार सुरू होते. यातच त्यांचे निधन झाले. त्यांच्या पश्चात पत्नी, एक वर्षाची मुलगी, आई-वडील, बहीण असा परिवार आहे.