रत्नागिरी- आजपासून श्रावण कार्यक्रमांना प्रारंभ

81802

करजुवेतील श्री तळेकरीण, भैरी मंदिरात
आजपासून श्रावण कार्यक्रमांना प्रारंभ
सकाळ वृत्तसेवा
रत्नागिरी, ता. ३ : संगमेश्वर तालुक्यातील करजुवे गावची ग्रामदेवता दुर्गादेवी तळेकरीण मातेच्या मंदिरात प्रतिवर्षाप्रमाणे श्रावण मासातील कार्यक्रमांना सुरुवात होणार आहे. उद्या (ता. ४) सकाळी १० वाजता सापड कार्यक्रम होईल. या वेळी सर्व ग्रामस्थ मिळून मंदिरा परिसराची स्वच्छता करतील. एकदिवशीय हरी नाम गजर म्हणजे एक्का येत्या ५ व ६ ऑगस्ट रोजी होणार आहे.
मंगळवारी (ता. ५) सकाळी ८.३० वाजता देवीची रूपे लावणे व गावातील पुरोहित यांचेकडून विधिवत पूजा होऊन कार्यक्रमाला सुरवात होईल. आरतीने कार्यक्रम सुरू होईल. यानंतर दुपारी १ वाजल्यापासून गावातील वाड्यांतील भजन मंडळाचे भजन होईल. दुपारी १ ते ३ यावेळेत तिसंगकरी ग्रामस्थ मंडळाचे भजन होईल. यानंतर ३ ते ६ सुतारवाडी, ६ ते ९ डावलवाडी, गुरव निवईवाडी ९ ते १२ याप्रमाणे भजने होतील. रात्री १२ ते १ आरती व यानंतर पुन्हा क्रमाने सकाळी ११ वाजेपर्यंत भजने होतील.
बुधवारी (ता. ६) रोजी सकाळी ११ वाजता सांगता कार्यक्रम सुरू होईल. रिमझिम पावसात देवनामाचा गजर करत पालखीसह सर्व ग्रामस्थ व भक्तगण देवळाभोवती पाच प्रदक्षिणा घालतील. त्यात भक्तगण तल्लीन होऊन नाचतील. यात आबालवृद्धांसह महिलाही सहभागी होतील. यानंतर सर्व मानकरी, खूमदार व भक्तगण यांच्या उपस्थितीत विसर्जन कार्यक्रम होईल. ७ ऑगस्टला जागर होईल. या दिवशी देवीचे पोवते वाटपाचा कार्यक्रम होईल. ११ ऑगस्टला देव भैरी मंदिरात अभिषेक होईल. या कार्यक्रमांना उपस्थित राहण्याचे आवाहन खोत मंडळी, खूमदार व गावकरी मंडळींनी केले आहे.