कणकवलीत सप्टेंबरला राष्ट्रीय लोक अदालत

कणकवलीत सप्टेंबरला
राष्ट्रीय लोक अदालत
कणकवली ः महाराष्ट्र राज्य विधी सेवा प्राधिकरण मुंबई, उच्च न्यायालय मुंबई व जिल्हा विधी सेवा प्राधिकरण, सिंधुदुर्ग यांच्या निर्देशानुसार कणकवली दिवाणी न्यायालय येथे १३ सप्टेंबरला सकाळी ११ वाजता राष्ट्रीय लोकअदालतीचे आयोजन केले आहे. दिवाणी न्यायालयातील प्रलंबित दिवाणी व फौजदारी प्रकरणे तसेच राष्ट्रीयकृत बँक, सहकारी बँक, स्वायत्त संस्था, ग्रामपंचायतीकडील वादपूर्व प्रकरणे तडजोडीने मिटवायची असतील, त्यांनी ती तालुका विधी सेवा समिती कणकवलीकडे दाखल करावीत. ज्यांना त्यांची प्रकरणे चर्चेद्वारे मिटवायची असतील, त्यांनी वादपूर्व चर्चेसाठी या न्यायालयात उपस्थित राहावे, असे आवाहन कणकवली दिवाणी न्यायाधीश तथा तालुका विधी सेवा समितीचे अध्यक्ष एस. जी. लटुरिया यांनी केले आहे.
----
पोईप येथे आज
दाखले वितरण
मसुरे ः महाराष्ट्र शासन महसूल विभागातर्फे महसूल सप्ताह साजरा करण्यात येत आहे. या सप्ताहात विविध उपक्रमांचे आयोजन केले आहे. या सप्ताहांतर्गत उद्या (ता. ४) छत्रपती शिवाजी महाराज महाराजस्व अभियाननिमित्त सकाळी ११ वाजता ग्रामपंचायत कार्यालय पोईप येथील सभागृहामध्ये विविध शासकीय दाखल्यांचे वाटप शिबिर आयोजित केले आहे. या शिबिरामध्ये ई-पीक पाहणी, ग्रीस्टॅक, पीएम किसान योजना व शासकीय योजनांचे मार्गदर्शन करण्यात येणार आहे. या दाखले वितरण शिबिराचा पोईप मंडळातील पोईप, चुनवरे, असरोंडी, आमवणे, किर्लोस, शिरवंडे, असगणी, राठिवडे, हिवाळे, ओवळीये, मसदे, वडाचापाट येथील सर्व नागरिकांनी लाभ घ्यावा, असे आवाहन प्रशासनाने केले आहे.
....................
मालवण पोलिसांकडून
परप्रांतीयांची चौकशी
मालवण ः वाढत्या चोरीच्या घटनांच्या पार्श्वभूमीवर मालवण पोलिस सतर्क झाले आहेत. शुक्रवारी (ता. १) दुपारी कोळंब हद्दीतील परप्रांतीय कामगारांच्या आधारकार्डची तपासणी करण्यात आली. पोलिस निरीक्षक मारुती जगताप यांच्या मार्गदर्शनाखाली पोलिस कर्मचारी सुशांत पवार, महादेव घागरे यांनी कोळंब परिसरातील परप्रांतीय कामगारांकडे असणाऱ्या आधारकार्डची तपासणी केली. मालवण शहरातील ज्या आंबा बागायतदार व ट्रॉलर मालकांकडे परप्रांतीय कामगार आहेत, त्यांनी परप्रांतीय कामगारांची आधारकार्ड घेऊन मालवण पोलिस ठाण्याशी संपर्क साधावा, असे आवाहन मालवण पोलिसांनी केले आहे. जिल्ह्यातील चोऱ्यांच्या पार्श्वभूमीवर पोलिसांकडून परप्रांतीयांची चौकशी सुरू आहे.
........................
श्रावण मासानिमित्त
दोडामार्गात कार्यक्रम
दोडामार्ग ः शहरातील साई मंदिर मठात श्रावण मासात गुरुवारी विविध धार्मिक व सांस्कृतिक कार्यक्रमांचे आयोजन करण्यात आले. याचा शुभारंभ नुकताच झाला. श्रावण मासानिमित्त दर गुरुवारी फुगडी, दिंडी व भजन आदी कार्यक्रम करण्यात येणार आहेत. या कार्यक्रमांना उपस्थित राहावे, असे आवाहन साई भक्तांना मठाधिपती दादासाई यांनी केले आहे.
---
मालवणात रविवारी
गुणगौरव सोहळा
मालवण ः मालवण तालुका तेली समाज उन्नती मंडळ, मालवणतर्फे २०२५-२६ मधील वार्षिक गुणगौरव व वार्षिक सभा रविवारी (ता. १०) दुपारी २ वाजता भरड मालवण येथील लिलांजली हॉल, भाऊ हडकर यांच्या घरी आयोजित केला आहे. तालुका पदाधिकारी व तालुका सदस्यांसह दहावी व बारावी, पदवीधर व इतर प्राविण्यप्राप्त विद्यार्थ्यांनी व पालकांनी उपस्थित राहावे, असे आवाहन मालवण तेली समाज अध्यक्ष राजन आचरेकर व सचिव मंगेश शेर्लेकर यांनी केले आहे.