कुडाळात रविवारी पाककला स्पर्धा

कुडाळात रविवारी
पाककला स्पर्धा
कुडाळ, ता. ३ ः माधवबाग कुडाळ क्लिनिकतर्फे पारंपरिक व आरोग्यदायी खाद्यसंस्कृतीला प्रोत्साहन देण्यासाठी ''माधवशक्ती राईस स्पेशल कोकण डिश कॉम्पिटिशन''चे आयोजन रविवारी (ता. १०) सकाळी ११ ते १२ या वेळेत माधवबाग कुडाळ क्लिनिक, पोस्ट कार्यालय नजीक येथे करण्यात आले आहे. स्पर्धेत सहभागी होणाऱ्या प्रत्येकाला पाव किलो आयुर्वेदिक माधवशक्ती राईस देण्यात येणार असून, त्यावर आधारित एक पारंपरिक कोकणी डिश तयार करायची आहे. या पदार्थात चव, आरोग्य दृष्टीकोन व नाविन्य यांचा उत्तम संगम असणे आवश्यक आहे. स्पर्धेतील पदार्थ बनवितानाचा व्हिडिओ क्लिनिकच्या नंबरवर पाठवावा. स्पर्धेच्या दिवशी काही भाग प्रत्यक्ष तयार करून आणावा. यासाठी अंतिम तारीख ६ ऑगस्ट आहे. विजेत्यांना आकर्षक बक्षिसे व विशेष सन्मान मिळणार असून, उत्तम रेसिपी माधवबाग कुडाळच्या यु-ट्युब चॅनलवर प्रदर्शित केल्या जातील.

बांद्यात रविवारी
बुद्धिबळ स्पर्धा
बांदा, ता. ३ ः येथे रविवारी (ता. १०) बुद्धिबळ स्पर्धेचे आयोजन करण्यात आले आहे. ही स्पर्धा पीएम श्री जिल्हा परिषद शाळा येथे सकाळी ९ ते सायंकाळी ५ या वेळेत पार पडणार आहे. स्पर्धेत दोन गट ठेवण्यात आले असून १६ वर्षांखालील आणि १६ वर्षांवरील स्पर्धकांना सहभागी होता येणार आहे. बुद्धिबळ या बौद्धिक क्रीडा प्रकाराला प्रोत्साहन मिळावे तसेच नवोदित खेळाडूंना योग्य व्यासपीठ उपलब्ध व्हावे, या उद्देशाने येथील रोटरॅक्ट रायझिंग युथ आणि रोटरी क्लब यांच्या संयुक्त विद्यमाने या स्पर्धेचे आयोजन करण्यात आले आहे. स्पर्धेत सहभागी होण्यासाठी बांदा आणि परिसरातील खेळाडूंनी मोठ्या संख्येने उपस्थित राहावे. अधिक माहिती व नावनोंदणीसाठी संकेत वेंगुर्लेकर, शिवम गावडे, बाबा काणेकर यांच्याशी संपर्क साधण्याचे आवाहन आयोजकांनी केले आहे.