महामार्गावर सावर्डे परिसरात मोकाट गुरांचा वावर

82066

महामार्गावर सावर्डे परिसरात मोकाट गुरांचा वावर
वाहनचालकांना अडथळा; अपघाताचा धोका वाढला
सकाळ वृत्तसेवा
सावर्डे, ता. ४ : गोवा-मुंबई महामार्गावर सावर्डे परिसरात मोकाट गुरांचा वावर वाढला आहे. गुरे रस्त्यावर बसून राहिल्यामुळे वाहनचालकांना अडथळा होत असून अपघाताचा धोका वाढलेला आहे. वाहनचालक आणि स्थानिक नागरिकांनी तक्रार करूनही त्यावर ठोस उपाययोजना केलेल्या नाहीत. याकडे गांभीर्याने लक्ष देत जनावरांचे मालक आणि स्थानिक प्रशासनाने त्वरित कारवाई करावी, अशी मागणी होत आहे.
राष्ट्रीय महामार्गावर दररोज हजारो वाहनांची रहदारी असते. डेरवण फाटा ते डेरवण रुग्णालय या मार्गावर अनेकदा मोकाट गुरे, म्हशी, गायी, वळू यांचा वावर दिसून येतो. काही वेळा ही गुरे रस्त्याच्या मध्यभागी बसून राहतात. त्यामुळे वाहनांना थांबावे लागते. अपघात होऊ नये, यासाठी वाहनचालकांना अधिक दक्षता घ्यावी लागते. काहीवेळा अचानक गुरे समोर आल्यामुळे ब्रेक दाबावे लागतात आणि पाठीमागून येणाऱ्या वाहनांची धडक बसण्याची शक्यता असते. याचा सर्वाधिक फटका दुचाकीस्वारांना बसतो. या समस्येकडे वेळेवर लक्ष न दिल्यास भविष्यात गंभीर अपघाताची शक्यता नाकारता येत नाही. त्यामुळे स्थानिक प्रशासन, महामार्ग प्राधिकरण आणि पोलिसांनी संयुक्तरीत्या पावले उचलून मार्ग सुरळीत करावा, अशी मागणी स्थानिकांकडून होत आहे. स्थानिक प्रशासन किंवा प्राणीसंवर्धन विभागाने यावर कार्यवाही करणे आवश्‍यक आहे. मोकाट जनावरे पकडून त्यांच्यासाठी स्वतंत्र गोठा व्यवस्था करणे, जनावरांच्या मालकांवर दंडात्मक कारवाई करणे अशा उपाययोजना राबविण्याची आवश्‍यकता आहे. नागरिकांच्या सुरक्षिततेसाठी आणि महामार्गावरील वाहतूक सुरळीत राहण्यासाठी ठोस निर्णय व अंमलबजावणी करण्याची आवश्‍यकता आहे.

कोट
गुरे रस्त्यावरच उभी राहतात आणि ती अचानक समोर येतात. रात्री त्यांच्या हालचाली वाहनचालकांना दिसत नाहीत आणि त्यामुळे अपघात होण्याची शक्यता असते.
- संजय शिंदे, वाहन चालक