रत्नागिरी ः अमेरिकेच्या टॅरीफमुळे पल्प निर्यातीला फटका

अमेरिकेच्या टॅरीफमुळे पल्प निर्यातीला फटका
निर्यात महागणार; आनंद देसाई यांचे केंद्र सरकारला साकडे
सकाळ वृत्तसेवा
रत्नागिरी, ता. ४ ः अमेरिकेने भारतावर लादलेल्या २५ टक्के आयात शुल्कामुळे कोकणातील आंबा पल्प उद्योगाला मोठा आर्थिक फटका बसणार आहे. नव्या टॅरिफमुळे विशेषतः रत्नागिरी हापूसच्या पल्पची होणारी निर्यात महागणार असून ग्राहक व उत्पादक दोघांच्याही समस्या वाढणार आहेत. टेरिफ तातडीने शुन्य टक्ंक्यावर आणावी आणि कोकणातील निर्यात उद्योगाला आधार द्यावा, अशी मागणी पल्प निर्यातदार आनंद देसाई यांनी भारत सरकारकडे केली.
अमेरिकेने लादलेल्या टॅरिफमुळे पुढील ९ महिने पल्पची विक्री कशी होईल, याबाबत निर्यातदार साशंक आहेत. देशभरात कोकणातील पल्पची मोठी मागणी असली तरीही किमतीत वाढ झाल्यास परदेशी बाजारपेठा हातून जाऊ शकतात. या संदर्भात मॅंगो पल्प निर्यातदार आनंद देसाई म्हणाले की, २५ टक्के टॅरिफ ही जबाबदारी आहे. आम्ही जवळपास ५० कोटी रुपयांचा पल्प अमेरिकेला पाठवतो आणि त्यावर १२. ५ कोटींचा टॅक्स लागेल. भारतातून दरवर्षी सुमारे १५ हजार मेट्रिक टन मॅंगो पल्प निर्यात होतो. त्यातील ३०० कोटीहून अधिक हिस्सा अमेरिकेकडे जातो. कोकणातूनच जवळपास ५० कोटींचा पल्प अमेरिकेत जातो. नवीन टॅरिफमुळ कोकणातून जाणाऱ्या पल्पवर १२.५ कोटींचा अतिरिक्त कर लागणार आहे.