मुख्यमंत्र्यांना लाडक्या बहिणी पाठविणार एक लाख राख्या

82172

मुख्यमंत्र्यांना लाडक्या बहिणी पाठविणार एक लाख राख्या

प्रभाकर सावंत ः प्रदेशाध्यक्ष रवींद्र चव्हाण यांच्या संकल्पनेतून उपक्रम

सकाळ वृत्तसेवा
ओरोस, ता.५ ः मुख्यमंत्री देवेंद्र फडणवीस यांना या रक्षाबंधन औचित्यावर महाराष्ट्र प्रदेश भाजप प्रदेशाध्यक्ष रवींद्र चव्हाण यांच्या संकल्पनेतून प्रत्येक बुथवरून १०० याप्रमाणे एकूण १ लाख राख्या आणि त्यांच्यासाठी शुभसंदेश पाठविण्याचे एक विशेष अभियान नियोजित केले आहे. जिल्ह्यातून एक लाख राख्या व शुभसंदेश पाठविण्यात येणार आहेत, अशी माहिती जिल्हाध्यक्ष प्रभाकर सावंत यांनी आज पत्रकार परिषदेतून दिली.
श्री. सावंत यांनी आज येथील जिल्हा परिषदेच्या पत्रकार कक्षात पत्रकार परिषदेत घेतली. यावेळी जिल्हा सरचिटणीस रणजित देसाई, जिल्हा उपाध्यक्ष प्रसन्ना देसाई, सुहास गवंडळकर, वृंदा गवंडळकर उपस्थित होते. श्री. सावंत म्हणाले, ‘जिल्ह्यातही नाविन्यपूर्ण अशा अभियानाचे नियोजन केले आहे. जिल्ह्यातील एकूण ९२१ बूथवरून प्रत्येकी किमान १०० राख्या अशा एकूण १ लाख राख्यांचे लिफाफे महाराष्ट्र प्रदेश कार्यालयात पाठवण्यात येणार आहेत. त्यानंतर एका विशेष कार्यक्रमात या सर्व राख्या मुख्यमंत्री फडणवीस यांना स्वाधीन करण्यात येणार आहेत. ९ ते १२ ऑगस्ट दरम्यान हे अभियान होणार आहे. लाडक्या बहिणींना मुख्यमंत्री फडणवीस यांच्या नेतृत्वाखालील सरकारने आर्थिक स्वरूपात मासिक भेट सुरू केल्याने समस्त महिला वर्गात एक समाधान आणि आनंदाचे वातावरण आहे. महिलांना आत्मनिर्भर आणि सन्मानित करणाऱ्या लाडकी बहीण योजनेचा लाभ घेणाऱ्या महिला मुख्यमंत्री फडणवीस यांना एक राखी आणि त्यांच्यासाठी शुभसंदेश पाठवणार आहेत. यासाठी जिल्हा भाजपकडून एक विशेष लिफाफा घरोघरी देण्यात येणार असून त्यामध्ये भगिनींनी आपल्याकडील राखी, दोरा आणि एक कागदावर दोन ओळीचा शुभसंदेश लिहून त्यावर आपल्या नाव पत्ता नंबरसह भाजप कार्यकर्त्यांकडे सुपूर्द करतील. त्यानंतर हे लिफाफे जिल्हा कार्यालयात जमा करण्यात येतील. भाजप कार्यकर्ते भगिनींच्या घरापर्यंत पोचतीलच पण ज्या भगिनींशी संपर्क होऊ शकणार नाही, अशा भगिनींनी आपल्या तालुक्यातील भाजप कार्यालयात आपली राखी जमा करावी.’
जिल्हा भाजपने जिल्हाध्यक्ष सावंत आणि पालकमंत्री नीतेश राणे यांच्या नेतृत्वाखाली जिल्हा तसेच मंडलनिहाय समित्यांचे गठण केले आहे. महिला जिल्हाध्यक्षा सौ. श्वेता कोरगावकर आणि जिल्हा सरचिटणीस संदीप साटम हे या अभियानाचे जिल्हा संयोजक असतील. तसेच प्रत्येक मंडलात दोन संयोजक नियुक्त केले आहेत. तसेच प्रत्येक जिल्हा परिषद, पंचायत समिती, शक्तीकेंद्र आणि बूथस्तरावर या अभियानाचे नियोजन सोमवारी झालेल्या नियोजन बैठकीत केले. श्री. चव्हाण यांनी भाजप प्रदेशाध्यक्ष पदाचा कार्यभार स्वीकारल्यानंतर प्रदेशस्तरावर महत्त्वाकांक्षी अशा संपर्क अभियानाला सुरुवात केली आहे. अलीकडेच मुख्यमंत्री फडणवीस यांच्या वाढदिनी राज्यात एकाच दिवशी १०८८ मंडलात ७८ हजार ३१३ बॉटल इतके विक्रमी रक्त संकलन केले, या विक्रमाची जागतिक स्तरावर नोंद झाली होती. त्याप्रमाणे हे अभियानही विक्रमी असणार आहे, असे श्री. सावंत यांनी सांगितले.