ओटवणे ग्रामस्थ मंडळातर्फे गुणगौरव

swt56.jpg
82278
मुंबईः ओटवणे ग्रामस्थ मंडळातर्फे सीता भाईप यांचा सन्मान करण्यात आला.

ओटवणे ग्रामस्थ मंडळातर्फे गुणगौरव
मुंबईतील सोहळाः ज्येष्ठ ग्रामस्थ सीता भाईप यांचा सत्कार
सकाळ वृत्तसेवा
ओटवणे, ता. ५ः मुंबई स्थित ओटवणे ग्रामस्थांच्या ओटवणे ग्रामस्थ मंडळ (मुंबई) चा २६ वा वार्षिक पारितोषिक वितरण सोहळा बोरिवली पूर्व देवीपाडा येथील शिवशक्ती विकास मंडळाच्या सभागृहात उत्साहात झाला.
यावेळी प्रमुख पाहूणे म्हणून महादेव परब, मंडळाचे अध्यक्ष चंद्रकांत सावंत, कार्याध्यक्ष गणपत गावकर, सरचिटणीस रामचंद्र गावकर, उपाध्यक्ष नितीन सावंत, खजिनदार गुरुनाथ गावडे, गंगाराम बिरोडकर आदी मान्यवर उपस्थित होते. या सोहळ्यात ज्येष्ठ चाकरमानी ग्रामस्थ म्हणून सीता भाईप यांची निवड करण्यात आली. मंडळाचे अध्यक्ष चंद्रकांत सावंत यांच्या हस्ते त्यांचा शाल, श्रीफळ व पुष्पगुच्छ देऊन सत्कार करण्यात आला. दरवर्षीप्रमाणे निवड केलेल्या ज्येष्ठ ग्रामस्थ भाईप यांना अर्जुन उर्फ तात्या गावकर यांनी छत्री भेट दिली.
यावेळी दहावी, बारावी आणि पदवी परीक्षा उत्तीर्ण झालेल्या रिद्धी धुरी, नेहा नाईक, आर्यन गावकर, शुभम नाईक या चाकरमान्यांच्या मुलांचा मान्यवरांच्या हस्ते सन्मानपत्र पुष्पगुच्छ व भेटवस्तू देऊन सत्कार करण्यात आला. सीता भाईप यांनी मंडळाच्या स्थापनेपासून मंडळाच्या जडणघडणीसह अनेक उपक्रमांची आपण साक्षीदार असल्याचे सांगत सर्व चाकरमान्यांनी या मंडळाच्या माध्यमातून संघटित व्हावे, असे आवाहन केले. ज्येष्ठ ग्रामस्थ म्हणून सन्मान केल्याबद्दल मंडळाचे आभार मानले. यावेळी गणपत गावकर, प्रा. नितीन सावंत, गोपाळकृष्ण सावंत, उमेश गावकर, आनंदा जाधव, यशवंत नाईक यांनी मनोगत व्यक्त केले
यावेळी मंगेश धुरी, महेंद्र गावकर, विलास तावडे, सहदेव गावकर, महेश मालजी, शिवराम गावकर, अशोक माटेकर, कमलाकर गावकर, दत्तात्रय गावकर, सचिन माटेकर, शंकर नाईक आदी उपस्थित होते. प्रास्ताविक मंडळाचे अध्यक्ष चंद्रकांत सावंत यांनी, सूत्रसंचालन मंडळाचे सरचिटणीस रामचंद्र गावकर यांनी केले. आभार कार्याध्यक्ष गणपत गावकर यांनी मानले.