रायपाटण येथे तालुकास्तरीय शालेय कबड्डी स्पर्धा

रायपाटण येथे शालेय कबड्डी स्पर्धा
सकाळ वृत्तसेवा
राजापूर, ता. ५ ः तालुक्यातील रायपाटण येथील श्री वडचाई व्यायामशाळा आणि क्रीडा प्रसारक मंडळाच्या रौप्य महोत्सवानिमित्त स्वातंत्र्यदिनाचे औचित्य साधून १५ ऑगस्ट रोजी तालुकास्तरीय शालेय कबड्डी स्पर्धेचे आयोजन करण्यात आले आहे. ही स्पर्धा १७ वर्षांखालील आणि ५० किलो वजनी गटासाठी आहे.
गेल्या काही वर्षापासून श्री वडचाई व्यायामशाळा व क्रीडा प्रसारक मंडळ यांच्यावतीने कबड्डी स्पर्धेचे आयोजन केले जात आहे. यंदा मंडळाचे रौप्य महोत्सवी वर्ष असून, त्या निमित्त तालुकास्तरीय स्पर्धेचे आयोजन केले आहे. या स्पर्धेतील विजेत्या संघाला ५ हजार रुपये आणि उपविजेत्या संघाला ३ हजार रुपये रोख व चषक तर तृतीय क्रमांक पटकावणाऱ्या संघाला २ हजार रुपयांसह चषक आणि प्रशस्तिपत्रक देण्यात येणार आहे. या व्यतिरिक्त स्पर्धेत उत्कृष्ट चढाई, उत्कृष्ट पकड अशी वैयक्तिक पारितोषिकेही देण्यात येणार आहेत. या व्यतिरिक्त स्पर्धेत सहभागी संघांना सहभाग प्रमाणपत्र देण्यात येणार आहे. प्रथम नावनोंदणी करणाऱ्‍या १० संघांना या स्पर्धेत प्रवेश दिला जाणार आहे. या स्पर्धेसाठी सहभागी होऊ इच्छिणाऱ्या शालेय संघांनी येत्या १० ऑगस्टपर्यंत नावनोंदणी करावी, असे आवाहन मंडळाचे अध्यक्ष दामोदर लिंगायत आणि सचिव अशोक शेट्ये यांनी केले आहे.