चिपळूण ः उड्डाणपुलाचे कामात सुरक्षिततेचा अभाव

उड्डाणपुलाच्या कामात सुरक्षिततेचा अभाव
महामार्ग अधिकाऱ्यांच्या ठेकेदारास सूचना; प्रांत कार्यालयात बैठकीचे आयोजन
सकाळ वृत्तसेवा
चिपळूण, ता. ५ःमुंबई-गोवा महामार्गावरील उड्डाणपुलाचे काम गेल्या चार वर्षांपासून सुरूच आहे. या कामात अपेक्षित सुरक्षितता बाळगली जात नसल्याने सातत्याने अपघात घडत आहेत. सोमवारीदेखील उड्डाणपुलाचे काम सुरू असतानाच पिलरवरील सळी महाविद्यालयीन विद्यार्थ्यांच्या हातावर पडल्याने सतप्त नागरिकांनी रास्तारोको केला. यावरून राष्ट्रीय महामार्गच्या अधिकाऱ्यांनी पुन्हा एकदा ठेकेदारास सुरक्षितता बाळगण्याच्या सूचना दिल्या, तर महामार्गसंबंधीच्या प्रश्नावर प्रांत कार्यालयात बैठकीचे आयोजन केले आहे.
मुंबई-गोवा राष्ट्रीय महामार्गाचे चिपळूण तालुक्यातील काम पूर्ण होत आले आहे. तीन वर्षांपूर्वी बहादूरशेखनाका येथे उड्डाणपुलाचे गर्डर कोसळल्यानंतर पुलाच्या रचनेत बदल करण्यात आला. उड्डाणपुलाच्या दोन पिलरमध्ये आणखी एक पिलर टाकला आहे. पूर्वी तयार केलेल गर्डर नष्ट करून तिथे नव्या रचनेनुसार काम सुरू केले आहे. उड्डाणपूल आणि महामार्गावर सातत्याने अपघात घडत आहेत. पुलाच्या कामातही ठेकेदाराकडून नियमानुसार सुरक्षितता बाळगली जात नसल्याचे अनेकदा उघड झाले आहे. गतवर्षी धावत्या ट्रकलाच गर्डरची जाळी अडकली होती तर पिलरचे काम सुरू असताना दोन कामगार पडून जखमी झाले होते. या अपघातांवेळी राष्ट्रीय महामार्ग विभागाकडून ठेकेदार कंपनीला सूचनावजा नोटिसा देण्यात येतात; मात्र त्याकडे ठेकेदाराकडून कानाडोळा केला जातो.

चौकट
पोलिसांत तक्रार करणार
सोमवारी घडलेल्या दुर्घटनेनंतर युवासेना आणि मनसे पदाधिकाऱ्यांनी रास्तारोको केला. जखमी दुचाकीस्वार ठेकेदार कंपनीविरोधात पोलिसांकडे तक्रार करणार असल्याची चर्चा सुरू आहे. उड्डाणपुलावरून सळी कोसळण्याची घटना घडल्यानंतर शुक्रवारी ८ रोजी प्रांताधिकारी आकाश लिगाडे यांनी महामार्ग आणि उड्डाणपुलासंदर्भात राष्ट्रीय महामार्ग विभागासह संबंधितांची बैठक आयोजित केली आहे, अशी माहिती युवासेनेचे तालुकाप्रमुख निहार कोवळे यांनी सांगितली.

कोट
उड्डाणपुलाचे काम करणाऱ्या ठेकेदार कंपनीला सुरक्षितता बाळगूनच काम करण्याच्या सूचना दिल्या आहेत. सोमवारी झालेल्या घटनेनंतरही राष्ट्रीय महामार्ग विभागाकडून काम सुरू असताना नागरिकांना कोणताही त्रास होणार नाही याची दक्षता घेण्याची तसेच काटेकोर सुरक्षा बाळगण्याची सूचना ठेकेदार कंपनीस केली आहे.
- श्याम खुणेकर, शाखा अभियंता, राष्ट्रीय महामार्ग विभाग, चिपळूण