निवळी येथे अपघात; टॅंकर चालकविरुद्ध गुन्हा

निवळी येथे अपघात;
टॅंकर चालकविरुद्ध गुन्हा
रत्नागिरीः जयगड ते निवळी जाणाऱ्या रस्त्यावर रावणंगवाडी-तिसंगी येथील वळणावर गॅस टॅंकर पलटी झाला. टॅंकरचालकाविरुद्ध ग्रामीण पोलिसात गुन्हा दाखल झाला आहे. हरिश्चंद्र राजकुमार पटेल (रा. जीरकप, पो. बरदिपार, ता. मच्छीशहा, जि. जवतपूर-उत्तरप्रदेश) असे संशयित चालकाचे नाव आहे. ही घटना सोमवारी (ता. ४) सकाळी सव्वासहाच्या सुमारास घडली. पोलिसांकडून मिळालेल्या माहितीनुसार, संशयित चालक हे ग्रॅस टॅंकर (क्र. टीएन ८८ एल-९६६१) घेऊन जयगड ते बंगळूर असा जात असताना निवळी येथील रावणंगवाडी-तिसंगी रस्त्यावरील वळणावर टॅंकर निष्काळजीपणे चालवून अपघात केला. या प्रकरणी पोलिस पाटील भालचंद्र शितप यांनी ग्रामीण पोलिसात तक्रार दिली.
----------
हातखंबा अपघातप्रकरणी
त्या टॅंकर चालकाविरुद्ध गुन्हा
रत्नागिरी ः हातखंबा गाव येथील हायस्कूलच्या वळणावर टॅंकर निष्काळजीपणे चालवून समोरच्या टेम्पो ट्रॅव्हलरला ठोकर देऊन अपघात करणाऱ्या टॅंकर चालकाविरुद्ध ग्रामीण पोलिसात गुन्हा दाखल केला आहे. सय्यद अबुतागीर ओलीस (वय ६२, रा. कुलमानस्ट्रीट अलिनाग्राम ठेणी, तामिळनाडू) असे संशयित चालकाचे नाव आहे. ही घटना सोमवारी (ता. ४) सकाळी नऊच्या सुमारास हातखंबा-गाव येथील हायस्कूलजवळील वळणावर घडली. पोलिसांकडून मिळालेल्या माहितीनुसार, संशयित चालक टॅंकर (क्र. के.ए.-०१ एजी ८४४७) घेऊन जयगड ते बेंगलोर येथे जात असताना टॅंकर निष्काळजीपणे चालवून हातखंबा हायस्कूलजवळील वळणावर समोरून येणाऱ्या टेम्पो ट्रॅव्हलरला ठोकर देऊन अपघात केला.
----------
जयगड-सडेवाडी येथे
मटका जुगारावर छापा
रत्नागिरी ः तालुक्यातील जयगड-सडेवाडी येथे मटका जुगारावर पोलिसांनी कारवाई केली. या कारवाईत साहित्यासह ३५० रुपयांचा मुद्देमाल जप्त केला. जयगड पोलिस ठाण्यात संशयित चालकाविरूद्ध गुन्हा दाखल कऱण्यात आला आहे. शुभम प्रकाश चव्हाण (वय ३२, रा. जुनी तांबटआळी, रत्नागिरी) असे संशयिताचे नाव आहे. ही घटना सोमवारी (ता. ४) दुपारी तीनच्या सुमारास जयगड-सडेवाडी, स्मशानभूमी येथील शेडच्या पाठीमागील बाजूस निदर्शनास आली.
---------
मद्यधुंद अवस्थेत
फिरणाऱ्या दोघांवर गुन्हा
रत्नागिरी ः लांजा तालुक्यातील लांजा बाजारपेठ येथे मद्यधुंद अवस्थेत फिरणाऱ्या तरुणांविरुद्ध लांजा पोलिस ठाण्यात गुन्हा दाखल कऱण्यात आला आहे. अनिल शिवराम दुड्ये (वय ३६) व नीलेश रमेश चव्हाण (वय ३५, दोघेही रा. देवधे मणचेकरवाडी, ता. लांजा) अशी संशयितांची नावे आहेत. ही घटना सोमवारी (ता. ४) सायंकाळी पाच वाजता लांजा बाजारपेठ येथे निदर्शनास आली.