हातात भगवी पताका, डोक्यावर तुळशी वृंदावन

- rat६p१५.jpg-
P२५N८२५१७
राजापूर ः भक्तमंदिर ते भक्ती मंदिर अशा निघालेल्या दिंडीमध्ये सहभागी झालेले वारकरी.
---
हातात भगवी पताका, डोक्यावर तुळशी वृंदावन
राजापूरमध्ये वारकरी दिंडी; हरिनामाच्या जयघोषाने परिसर दुमदुमला
सकाळ वृत्तसेवा
राजापूर, ता. ६ ः श्रावणी एकादशीचे औचित्य साधून राजापूर शहरातील श्री विठ्ठल मंदिरात तालुक्यातील वारकरी मंडळींच्यावतीने भक्तमंदिर (पुंडलिक मंदिर) ते भक्ती मंदिर (विठ्ठल मंदिर) अशी वारकरी दिंडी काढण्यात आली. हातात भगवी पताका अन् डोक्यावर तुळशी वृंदावन घेऊन टाळमृदूंगाच्या गजरात देहभान विसरून, लयबद्ध ठेका धरत राजापूरमधील वारकरी दिंडीत सहभागी झाले आहेत. वारकऱ्यांच्या मुखातून होणाऱ्‍या हरिनामाच्या जयघोषाने राजापूर परिसर दुमदुमच गेला.
सर्वसामान्यांचे श्रद्धास्थान असलेल्या श्री विठ्ठलाचे दर्शन घेण्याची वारकऱ्यांसह भाविकांना कायमच आस लागलेली असते. त्यासाठी अनेक भाविक दरवर्षी पंढरपूरची वारी मोठ्या श्रद्धेने करतात. काहींना पंढरपूर वारी करणे शक्य होत नाही. अशा वारकऱ्यांसह विठ्ठलभक्तांना पंढरपूरवारीची अनुभूती मिळावी यासाठी गतवर्षीपासून राजापूर शहरामध्ये ‘भक्तमंदिर ते भक्तीमंदिर’ अशी वारकरी दिंडी काढली जाते. त्याप्रमाणे यावर्षीही श्रावण एकादशीचे औचित्य साधून वारकरी दिंडी सोहळा पार पडला. अर्जुना-कोदवली नद्यांच्या संगमतीरावरील राजापुरातील प्रसिद्ध पुंडलिक मंदिरात दिंडी सोहळ्याला सुरुवात झाली. अर्जुना-कोदवली नदीच्या संगमावरील श्री पुंडलिक मंदिरामध्ये दादा राजापकर (महाराज) यांच्या हस्ते पूजा झाल्यानंतर श्री पुंडलिक मंदिर-बंदरधक्का परिसर-जवाहरचौक-बाजारपेठ अशी निघालेल्या पायी दिंडीची बाजारपेठेतील श्री विठ्ठल मंदिरामध्ये येऊन सांगता झाली. या सोहळ्यामध्ये दादा राजापकर (महाराज) यांच्या मार्गदर्शनाखाली वारकरी सांप्रदाय-उन्हाळे, हर्डी, गोवळ, शिवणे, देवाचेगोठणे, पाथर्डे, कोदवली, सोलगाव, शीळ या गावांसह तालुक्याच्या विविध भागातील वारकरी मोठ्या संख्येने सहभागी झाले होते. हातामध्ये टाळ, गळ्यामध्ये वीणा आणि खाद्यांवर भगवी पताका घेत वारकरी या पायी दिंडी सोहळ्यामध्ये सहभागी झाले होते. तर, डोक्यावर तुळशी वृंदावन घेत महिला वारकरीही मोठ्या संख्येने सहभागी झाल्या होत्या. वारकरी दिंडीमध्ये सहभागी झालेल्या आबालवृद्धांसह लहान-थोर मंडळी आणि वारकऱ्‍यांनी लयबद्ध ठेका धरत हरिनामाचा केलेल्या गजराने राजापूर शहर परिसर दुमदुमून गेला होता.