बांधकाम मंत्री आज करणार महामार्गाची पाहणी

बांधकाममंत्री आज करणार महामार्गाची पाहणी
मंत्री शिवेंद्रसिंहराजे भोसलेंचा दौरा; ६ टप्प्यांचा घेणार आढावा
सकाळ वृत्तसेवा
रत्नागिरी, ता. ६ : राज्याचे सार्वजनिक बांधकाममंत्री शिवेंद्रसिंहराजे भोसले गुरूवारी (ता. ७) जिल्हा दौऱ्यावर आहेत. या दौऱ्यामध्ये ते गणेशोत्सवापूर्वी मुंबई-गोवा महामार्गाच्या कामाचा आढावा घेणार आहेत. तेरा ते चौदा वर्षे सहा टप्प्यांपैकी किती टप्प्यांचे काम पूर्ण झाले, कोणते अपूर्ण आहे आणि ते कधी पूर्ण होणार, याची प्रत्यक्ष भेट देऊन माहिती घेणार आहेत.
गणेशोत्सव तोंडावर आला आहे. त्यासाठी चाकरमानी मोठ्या संख्येने कोकणात दाखल होतात. यंदाही महामार्गाचे काम अपूर्ण आहे. त्यामुळे गणेशभक्तांना यंदाही खडतर प्रवास होणार की, गणेशोत्सवापूर्वी महामार्गावर मलमपट्टी करणार, याकडे सर्वांचे लक्ष आहे. सार्वजनिक बांधकाममंत्री भोसले गुरूवारी (ता. ७) कशेडी बोगद्याची सायंकाळी चार वाजता पाहणी करणार आहेत तसेच पॅकेज-३ची पाहणी (९ किमी) होणार आहे. साडेचार ते पाचपर्यंत कशेडी ते परशुराम घाट पॅकेज-४ची पाहणी (४२ किमी) होणार आहे. सायंकाळी ५ ते ५.४५ वाजता परशुराम-चिपळूण-आरवली या पॅकेज ५ची पाहणी (३५ किमी) करणार आहेत तसेच ५.४५ ते ६.३० या दरम्यान आरवली ते कांटे पॅकेज-६ची पाहणी (४० किमी) करणार आहेत. ६.३० ते ७ पर्यंत कांटे ते हातखंबा, हातखंबा ते रत्नागिरीची पाहणी करणार आहेत.

चौकट...
उद्या आढावा बैठक
सार्वजनिक बांधकाममंत्री शिवेंद्रसिंहराजे भोसले शुक्रवारी (ता. ८) सकाळी १० ते ११ वाजता राष्ट्रीय महामार्गासंदर्भात आढावा बैठक घेणार आहेत. येथील शासकीय विश्रामगृहातही आढावा बैठक होणार आहे. त्यानंतर ते रत्नागिरी ते हातखंबा (१५ किमी), सकाळी ११.१५ ते १२.१५ पर्यंत हातखंबा ते वाकेड, राष्ट्रीय महामार्ग पॅकेज ७ची पाहणी करून ते साताऱ्याकडे रवाना होतील.