जिल्ह्यातील एक हजार दहा विद्यार्थी पुस्तकांच्या प्रतिक्षेत

पुस्तकाच्या प्रतीक्षेत एक हजार विद्यार्थी
जिल्ह्यातील स्थिती ; छपाई कामास विलंब
सकाळ वृत्तसेवा
रत्नागिरी, ता. ६ ः जिल्हा परिषदेच्या समग्र शिक्षा अभियानांतर्गत शासकीय जिल्हा परिषद, अनुदानित शाळेतील विद्यार्थ्यांना मोफत पाठ्यपुस्तकांचे वितरण केले जाते. यावर्षी विषयनिहाय पुस्तके विद्यार्थ्यांना उपलब्ध करून दिली आहेत. उर्दू माध्यमाच्या पहिलीत शिकणाऱ्या १ हजार १० विद्यार्थ्यांना मजेत शिकू या मराठी विषयाची पुस्तके अद्याप उपलब्ध झालेली नाहीत.
नवीन शैक्षणिक वर्ष २०२५-२६ सुरू होऊन दोन महिने लोटले. पहिली घटक चाचणी काही शाळेत सुरू झाली आहे. तरीही विद्यार्थ्यांना पुस्तके उपलब्ध झालेली नाहीत. छपाईसाठी विलंब झाला असल्याचे कारण सांगण्यात येत आहे; परंतु येत्या दोन दिवसांत पुस्तके उपलब्ध होतील, असे शिक्षण विभागाकडून सांगण्यात आले. पुस्तके उपलब्ध नसल्याने शिक्षक गतवर्षीच्या पुस्तकाचा आधार घेत विद्यार्थ्यांना शिकवत आहेत. त्यामुळे नवे वर्ष; पण पुस्तके जुनी असे म्हटले तरी चुकीचे ठरणार नाही. पहिलीच्या वर्गाची पुस्तके असल्यामुळे या विषयांकडे फारसे गांभीर्याने पहिले जात नाही. जिल्ह्यातील पहिली ते आठवीच्या विद्यार्थ्यांसाठी एकूण ६ लाख दोन हजार ५१२ पुस्तकांची मागणी करण्यात आली होती. त्यापैकी सहा लाख १ हजार ५०२ पुस्तके प्राप्त झाली आहेत. पहिलीच्या वर्गातील उर्दू माध्यमाच्या विद्यार्थ्यांसाठी मजेत शिकू या मराठी या विषयाची १ हजार १० पुस्तके छपाई कामाच्या विलंबामुळे उपलब्ध होण्यास दिरंगाई झाली आहे.

चौकट
उर्दू भाषेची पुस्तके उपलब्ध होणार
समग्र शिक्षा अभियानांतर्गत पहिली ते आठवीपर्यंतच्या विद्यार्थ्यांसाठी पुस्तके उपलब्ध झाली; परंतु उर्दू माध्यमाची पहिलीच्या वर्गाची मराठी भाषेची पुस्तके उपलब्ध झाली नव्हती; परंतु येत्या २ ते ३ दिवसात उपलब्ध होणार असल्याचे प्राथमिकचे प्रभारी शिक्षणाधिकारी किरण लोहार यांनी सांगितले.