-देवरुखमध्ये भटक्या कुत्र्यांचा त्रास वाढला

देवरूखमध्ये भटक्या कुत्र्यांचा त्रास
दोघांना चावा ; नागरिकात घबराट, बंदोबस्ताची मागणी
सकाळ वृत्तसेवा
देवरूख, ता. ७ ः संगमेश्वर तालुक्यातील देवरूख शहरात भटक्या कुत्र्यांचा उपद्रव वाढला असून, या कुत्र्यांच्या टोळीने शहरात उच्छाद मांडला आहे. दोघांना या कुत्र्यांनी चावा घेतला. मागील काही दिवसांपासून शहरात झुंडीने फिरणाऱ्या भटक्या कुत्र्यांची संख्या वाढली आहे. हे कुत्रे रस्त्यावरून चालणाऱ्या नागरिकांचा तसेच वाहनांचा भुंकत जाऊन पाठलाग करत असल्याने वाहनचालक व नागरिकांमध्ये भीतीचे वातावरण आहे. नगरपंचायतीने भटक्या कुत्र्यांचा वेळीच बंदोबस्त करण्याची मागणी नागरिकांमधून करण्यात आली आहे.
देवरूख शहरात ठिकठिकाणी भटक्या कुत्र्यांच्या झुंडी फिरत असल्याने त्याचा त्रास नागरिक व वाहनचालकांना होत आहे. रात्रीच्या वेळेस दुचाकीवरून जाणाऱ्या वाहनचालकांच्या अंगावर भटके कुत्रे भुंकत जात असल्याने अपघाताला निमंत्रण मिळत आहे. या कुत्र्यांवर नगरपंचायतीने त्वरित कारवाई करून कायमचा बंदोबस्त करण्याची मागणी होत आहे. गाडीचा प्रकाश दिसताच पाठीमागून ते धावत येतात. या परिस्थितीत दुचाकी जोरात चालवल्यास गंभीर अपघात होण्याची दाट शक्यता आहे. शहरात या कुत्र्यांमुळे नागरिकांमध्ये भीतीचे वातावरण आहे.
-----
कोट
देवरूख शहरात भटक्या कुत्र्यांचा त्रास प्रचंड वाढला आहे. हे कुत्रे नागरिकांचा पाठलाग करून हल्ला करत आहेत. त्यामुळे नागरिक भयभीत झाले आहेत. नगरपंचायतीने त्वरित उपाययोजना करणे गरजेचे आहे तसेच नागरिकांना सावध करण्यासाठी बाजारपेठेत, चौकांमध्ये, रहदारीच्या ठिकाणी विशेषतः बसस्थानकासमोर कुत्र्यांपासून सावधान असे फलक लावावेत तसेच नगरपंचायतीने स्वखर्चाने श्वानघर उभारावे. तिथे भटक्या कुत्र्यांवर निर्बीजीकरण करावे.
- निखिल कोळवणकर, अध्यक्ष, क्रांती व्यापारी संघटना, देवरूख.