-एसटीची स्मार्टकार्ड योजना झाली बंद

एसटीची ‘स्मार्टकार्ड’ योजना बंद
विविध सवलतींसाठी होते कार्ड; प्रवाशांकडे पुन्हा कागदी पासच
सकाळ वृत्तसेवा
रत्नागिरी, ता. ७ : राज्य परिवहन महामंडळातर्फे कागदी ओळखपत्राऐवजी स्मार्टकार्ड उपलब्ध करून देण्यात आले होते; मात्र, ही योजना बंद पडली असून, प्रवाशांना जुन्या कागदी ओळखपत्रावरच प्रवास करावा लागणार आहे. कागदी पास खराब होणे, गहाळ होण्याची भीती असल्यामुळे स्मार्टकार्डसाठी मागणी जोर धरत आहे.
राज्य परिवहन महामंडळातर्फे विविध घटकातील प्रवाशांना सवलती देण्यात येतात. त्यामध्ये ६५ वर्षांपुढील, ज्येष्ठ नागरिकांना तिकीटदरात ५० टक्के सवलत, ७५ वर्षांपुढील अमृत ज्येष्ठ नागरिकांना तिकीटदरात शंभर टक्के सवलत, अधिस्वीकृतीधारक पत्रकार, माजी सैनिक, लोकप्रतिनिधी, विद्यार्थी यांना एसटीतून प्रवास करताना तिकीटभाड्यात सवलत देण्यात येते. सवलत घेणाऱ्या लाभार्थी प्रवाशांना पूर्वी कागदी ओळखपत्र देण्यात येत होते; मात्र, स्मार्टकार्ड योजनाच बंद पडल्यामुळे प्रवाशांना पुन्हा कागदीच पास वापरावे लागणार आहेत. कागदी पास खराब होणे, गहाळ होण्याची भीती असल्यामुळे स्मार्टकार्डसाठी मागणी जोर धरत आहे.

चौकट...
बनावटगिरी वाढल्यामुळे स्मार्टकार्ड
कागदी ओळखपत्राचा गैरवापर वाढल्यामुळे एसटीने आधुनिक तंत्रज्ञानाचा वापर करून स्मार्टकार्ड सुविधा सुरू केली होती. नऊ वर्षापूर्वी वितरित केलेली स्मार्टकार्ड मात्र अचानक बंद केली आहेत. लाभार्थी ग्राहकांना नवीन स्मार्टकार्ड काढणे किंवा मुदत संपलेल्या जुन्या स्मार्टकार्डचे नुतनीकरण करणेही थांबले आहे. त्यामुळे सध्यातरी जुने कागदी पासच वापरावे लागणार आहेत.

कोट...
सुट्टया पैशांची गैरसोय टाळणे व कॅशलेस व्यवहार सुलभ करण्यासाठी स्मार्टकार्ड प्रवाशांना उपलब्ध करून दिली होती; मात्र तांत्रिक समस्या व कार्यपद्धतीतील अडचणींमुळे ही योजना बंद असली तरी याबाबत स्मार्टकार्ड वितरणाबाबत लवकरच निर्णय घेण्यात येणार आहे.

-प्रज्ञेश बोरसे, विभाग नियंत्रक, रत्नागिरी