डॉ. बाबासाहेबांच्या दोन्ही स्मारकांचा विकास आराखडा

-rat७p२१.jpg-
P२५N८२७८९
मुंबई ः मंत्रालय येथील बैठकीला उपस्थित गृहराज्यमंत्री योगेश कदम, जिल्हाधिकारी एम. देवेंदर सिंह आणि अन्य अधिकारी.
---

डॉ. आंबेडकरांच्या दोन्ही स्मारकांचा विकास आराखडा
मंत्री योगेश कदम ः आंबडवेत स्मारक, घरांच्या पुनर्वसनाबाबत बैठकीत सूचना
सकाळ वृत्तसेवा
मंडणगड, ता. ७ ः तालुक्यातील मौजे आंबडवे येथील भारतरत्न डॉ. बाबासाहेब आंबेडकर यांच्या जुन्या व नवीन स्मारकाचा विकास आराखडा एकत्रित तयार करण्याचा निर्णय घेण्यात आला आहे. भारतरत्न डॉ. बाबासाहेब आंबेडकर यांचे मूळगाव आंबडवे या गावी डॉ. बाबासाहेबांच्या जुन्या घरावर स्मारक बांधण्यात आले आहे. नव्याने या स्मारकाचा आणि गावाचा विकास करण्यासंदर्भात मंत्री योगेश कदम यांनी पुढाकार घेतला आहे.
या संदर्भात मंत्रालय येथे गृहराज्यमंत्री योगेश कदम यांच्या अध्यक्षतेखाली बैठक झाली. सद्यःस्थितीत असलेले डॉ. बाबासाहेब आंबेडकर यांचे स्मारक आणि नवीन स्मारकासाठी एकत्रित प्रारूप आराखडा समाजकल्याण विभागाने तयार करावा, अशा सूचना मंत्री योगेश कदम यांनी बैठकीत दिल्या तसेच परिसरातील घरे आणि कुटुंबांचे पुनर्वसन करणे गरजेचे असून, त्यासाठी पर्यायी जमीन शोधण्याच्या सूचना जिल्हा प्रशासनास दिल्या. बैठकीला जिल्हाधिकारी एम. देवेंदर सिंह, उपविभागीय अधिकारी डॉ. विजयकुमार सूर्यवंशी, सहसचिव सार्वजनिक बांधकाम विभाग सो. ना. बागूल आदी उपस्थित होते.

चौकट -
तीन तालुक्यातील क्रीडा संकुलाबाबत चर्चा
खेड, दापोली आणि मंडणगडमधील तालुका क्रीडा संकुलासाठी आवश्यक असलेल्या पायाभूत सोयीसुविधा आणि विविध उपाययोजनांबाबत बैठकीत चर्चा झाली. विभागीय अधिकारी, तिन्ही तालुक्याचे तहसीलदार आणि तालुका क्रीडाधिकारी यांच्यासमवेत व्हिडिओ कॉन्फरन्सिंगद्वारे मंत्री कदम यांनी संवाद साधला. तिन्ही तालुक्यातील संकुलांसाठी असलेल्या निधीचा योग्यप्रकारे विनियोग करून उत्तम दर्जाच्या सुविधा लवकरात लवकर होतकरू खेळाडूंना उपलब्ध करून देण्याच्या सूचना मंत्री योगेश कदम यांनी दिल्या.