वनपालांविरोधातील तक्रारीवर कारवाई न झाल्याने उपोषण

82814

वनपालांविरोधातील तक्रारीवर
कारवाई न झाल्याने उपोषण
जयंत बरेगारः जिल्हा पोलिस अधीक्षक कार्यालयासमोर ठिय्या
सकाळ वृत्तसेवा
सिंधुदुर्गनगरी, ता. ७ः माणगाव येथील तत्कालीन वनपालांविरोधात तक्रार करुन चार वर्षे उलटली तरी कोणतीच ठोस कारवाई न झाल्याप्रकरणी पोलिस अधिक्षकांचे लक्ष वेधण्यासाठी सामाजिक कार्यकर्ते जयंत बरेगार यांनी आजपासून येथील जिल्हा पोलिस अधीक्षक कार्यालयासमोर उपोषण सुरु केले आहे.
माणगाव येथील तत्कालीन वनपाल यांच्या विरोधात जयंत बरेगार यांनी ७ एप्रिल २०२१ ला कुडाळ पोलिसात तक्रार अर्ज दाखल केला होता. त्यावर तब्बल १३ महिन्यांनी म्हणजे १३ मे २०२२ ला गुन्हा दाखल केला. त्यानंतर जिल्हा पोलिस अधीक्षक यांचे लेखी निवेदनाद्वारे लक्ष वेधले असता त्यांच्या वतीने तीन उपविभागीय पोलीस अधिकारी तसेच कुडाळ पोलीस ठाण्यातील सहायक पोलीस निरीक्षक यांच्यामार्फत चौकशी झालेली आहे. मात्र, अद्याप कारवाई झालेली नाही. तीन वेळा उपोषणे करूनही या प्रकरणाची दखल घेतलेली नाही. यामुळे या प्रकरणाचा अर्ज आपल्या कार्यालयाकडे २१ ऑक्टोबर २०२१ पासून न्यायाच्या प्रतीक्षेत आहे, असे बरेगार यांनी पोलिस अधीक्षक यांना दिलेल्या निवेदनात म्हटले आहे.
तरी याबाबत न्याय मिळावा व संबंधित दोषींवर कारवाई व्हावी, अशी मागणी करण्यासाठी त्यांनी आजपासून जिल्हा पोलीस अधीक्षक कार्यालयासमोर उपोषण सुरू केले आहे आणि जोपर्यंत संबंधितांवर कारवाई होत नाही, तोपर्यंत उपोषण सुरूच राहील, असा निर्धार केला आहे. तसेच तक्रार देऊन चार वर्षाचा कालावधी निघून गेला तरी अद्याप कारवाई होत नसल्याने पोलिस प्रशासनाच्या कारभाराबाबत त्यांनी तीव्र नाराजी व्यक्त केली आहे.