क्राइम

धनजीनाका येथील
हातभट्टीवर कारवाई
रत्नागिरी ः शहरातील धनजीनाका-बेलबाग येथे विनापरवाना हातभट्टीची दारूविक्रीवर पोलिसांनी कारवाई केली. या कारवाईत २ हजार १०० रुपयांची १९ लिटर दारू जप्त केली. शहर पोलिस ठाण्यात संशयितांविरुद्ध गुन्हा दाखल करण्यात आला आहे. सचिन सुरेश गुरव (वय ५०, रा. झारणी रोड, रत्नागिरी) असे संशयिताचे नाव आहे. ही घटना बुधवारी (ता. ६) दुपारी धनजीनाका-बेलबाग येथील एका घराच्या पाठीमागील बाजूला निदर्शनास आली. पोलिसांकडून मिळालेल्या माहितीनुसार, संशयित विनापरवाना हातभट्टीची १९ लिटर दारू विक्रीसाठी आपल्या ताब्यात बाळगलेल्या स्थितीत सापडला. या प्रकरणी स्थानिक गुन्हे शाखेचे पोलिस हवालदार बाळू पालकर यांनी शहर पोलिस ठाण्यात तक्रार दिली.
-----
चाँदसूर्या येथे
विदेशी मद्य जप्त
रत्नागिरी ः शहरानजीकच्या चाँदसूर्या-खेडशी येथे विदेशी मद्यसाठ्यावर पोलिसांनी कारवाई केली. या कारवाईत ३ हजार ६०५ रुपयांची दारू जप्त केली. ग्रामीण पोलिस ठाण्यात संशयिताविरुद्ध गुन्हा दाखल करण्यात आला आहे. महेश रमेश चव्हाण (वय ४५, रा. कारवांचीवाडी, रत्नागिरी) असे संशयिताचे नाव आहे. ही घटना बुधवारी (ता. ६) दुपारी अडीचच्या सुमारास खेडशी-चाँदसूर्या येथील एका माडीविक्रीच्या दुकानाच्या पाठीमागे निदर्शनास आली. पोलिसांकडून मिळालेल्या माहितीनुसार, पोलिसांनी केलेल्या कारवाईत संशयितांकडे ३ हजार ६०५ रुपयांची विदेशी मद्याचा साठा विक्रीसाठी ठेवलेल्या स्थितीत सापडला. या प्रकरणी स्थानिक गुन्हा अन्वेषण शाखेचे भैरवनाथ सवाईराम यांनी ग्रामीण पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे.
-----
संशयास्पद हालचाली
करणाऱ्यावर गुन्हा
पावस ः रत्नागिरी ते पावस जाणाऱ्या रस्त्यावर गोळप दर्गा स्टॉप येथे एक लोखंडी सुरा घेऊन संशयास्पदरीत्या आढळलेल्या वृद्धाविरुद्ध पूर्णगड सागरी सुरक्षा पोलिस ठाण्यात गुन्हा दाखल करण्यात आला आहे. रवींद्र भिकाजी जांभळे (वय ६२, रा. गोळप-कातळवाडी, रत्नागिरी) असे संशयिताचे नाव आहे. ही घटना मंगळवारी (ता. ५) रात्री दहाच्या सुमारास गोळप दर्गा स्टॉप येथे निदर्शनास आली. पोलिसांकडून मिळालेल्या माहितीनुसार, संशयित जांभळे हे मंगळवारी रात्री काळोखात संशयास्पद हालचाली व अस्तित्व लपवत असलेल्या स्थितीत सापडले. त्यांच्याकडे मूळ नसलेला जुना लोखंडी सुरा सापडला. या प्रकरणी पोलिस नाईक संदीप महाडीक यांनी पूर्णगड सागरी सुरक्षा पोलिस ठाण्यात तक्रार दिली. तक्रारीवरून पोलिसांनी संशयिताविरुद्ध गुन्हा दाखल केला आहे.