गणेशोत्‍सवात वाहतूक कोंडी टाळण्यासाठी दक्ष राहा

82962

गणेशोत्‍सवात वाहतूक कोंडी टाळण्यासाठी दक्ष राहा
मुख्याधिकारी गौरी पाटीलः नगरपंचायतीमध्ये गणेशोत्‍सव नियोजन बैठक
सकाळ वृत्तसेवा
कणकवली, ता. ८ः गणेशोत्‍सव काळात महामार्ग, बाजारपेठ आणि शहरातील अन्य रस्त्यांवर वाहतूक कोंडी होऊ नये याची दक्षता पोलीस प्रशासनाने घ्यावी. तसेच वीज पुरवठा खंडित होऊ नये यासाठी आत्ताप महावितरणने उपाययोजना कराव्यात. तर शहरातील सेवा रस्त्यांवर कुठल्‍याही विक्रेत्‍यांना व्यवसाय करण्यासाठी बसू देऊ नका अशा सूचना मुख्याधिकारी गौरी पाटील यांनी दिल्‍या.
येथील नगरपंचायतीच्या सभागृहात गणेशोत्‍सव नियोजनाची बैठक झाली. यात मुख्याधिकारी गौरी पाटील यांच्यासह प्रशासकीय अधिकारी अमोल अघम, सहाय्यक पोलीस निरीक्षक पवन कांबळे, वाहतूक पोलीस दिलीप पाटील, पोलीस हवालदार पांडुरंग कळंत्रे उपस्थित होते.
बैठकीच्या सुरवातीला शहरातील वाहतूक कोंडी आणि त्‍यावरील उपाययोजना या मुद्द्यांवर उपस्थितांमध्ये चर्चा झाली. यात कणकवली आचरा मार्गावर सर्वाधिक वाहतूक कोंडी होते. ही कोंडी टाळण्यासाठी मुख्य पटवर्धन चौकातून होणारी अवजड वाहतूक लक्ष्मी चित्रमंदिर ते गांगो मंदिर या रस्त्यावरून वळविण्याचे निश्‍चित करण्यात आले. तर शहरातील उड्डाणपुलाखालील सेवा रस्त्यावरील कोंडी टाळण्यासाठी तेलीआळी डीपी रोड लगत दुचाकी वाहन पार्किंगचे नियोजन करण्यात आले. तर उड्डाणपुलाखालील जे मोकळे गाळे आहेत, तेथे चार चाकी वाहनांचे पार्किंग करण्याचे सर्वानुमते निश्‍चित करण्यात आले.
गणेशोत्‍सव काळात अवजड वाहनांना प्रवेश बंदी, ठिकठिकाणी नो पार्किंग आणि पार्किंगसाठीचे फलक, एक दिशा मार्गाचे फलक आदींबाबतचे फलक नगरपंचायतीचे लावावे, अशी सूचना पोलीस अधिकाऱ्यांनी केली. तर कणकवली शहरात गणेशोत्‍सव कालावधीत वीज पुरवठा खंडित होऊ नये याची दक्षता महावितरणने घ्‍यावी. वीज पुरवठ्याबाबत जी कामे प्रलंबित असतील ती कामे येत्‍या आठ दिवसांत पूर्ण करा असे निर्देश मुख्याधिकारी गौरी पाटील यांनी महावितरण अधिकाऱ्यांना दिले. शहरातील उड्डाणपुलाखाली तसेच सेवा रस्त्यावर विक्रेते बसू नयेत यासाठीची दक्षता पोलिसांनी घ्यावी. तर कणकवली बाजारपेठेत रस्ता दुतर्फा पांढरे पट्टे मारून तेथे विक्रेत्‍यांना बसण्याचे नियोजन केले जाईल अशी माहिती गौरी पाटील यांनी दिली.