मराठा समाजामार्फत विद्यार्थ्यांना आवाहन

मराठा समाजामार्फत
विद्यार्थ्यांना आवाहन
कुडाळः सिंधुदुर्ग जिल्ह्याचे रहिवाशी असलेल्या मराठा समाजातील ज्या पालकांची मुले बी. एस. सी. आयटी, कॉम्प्युटर, सीए तसेच मेडिकल, इंजिनिअरिंग, अॅग्रीकल्चर, फार्मसीमध्ये शिक्षण घेत आहेत, अशा गरजू विद्यार्थ्यांना शिष्यवृत्ती देण्यात येणार आहे. त्याकरिता गरजू विद्यार्थ्यांकडून संस्थेतर्फे छापील अर्ज मागविण्यात येत आहेत. इच्छुक विद्यार्थ्यांनी छापील अर्जांकरिता संस्थेच्या कुडाळ कार्यालयाशी संपर्क साधावा. सावंतवाडी संस्थान मराठा समाज मुंबई, मराठा समाज हॉल, कुडाळ हायस्कूल नजीक, ता. कुडाळ या पत्त्यावर ३० ऑगस्टपूर्वी सकाळी दहा ते सायंकाळी सहापर्यंत संपर्क साधावा.
..................
‘महाभारताचे अंतरंग’चे
कुडाळात उद्या प्रकाशन
कुडाळः माठेवाडा येथील वेदांत पंडित याने लिहिलेल्या ‘महाभारताचे अंतरंग’ या पुस्तकाचे प्रकाशन वैद्यराज परीक्षित शेवडे यांच्या हस्ते रविवारी (ता. १०) सायंकाळी ४.३० वाजता चिं. त्र्यं. खानोलकर ललित कला केंद्र, कुडाळ येथे होणार आहे. या कार्यक्रमास सर्वांनी उपस्थित राहावे, असे आवाहन विवेक पंडित यांनी केले आहे. प्रमुख वक्ते वैद्यराज शेवडे आयुर्वेद वाचस्पती, एम.डी. (आयुर्वेद) लेखक व व्याख्याते आहेत. वक्तृत्व तंत्र आणि मंत्र, घरोघरी आयुर्वेद, जमात-ए-पुरोगामी अशी त्यांची एकूण अकरा पुस्तके प्रकाशित झाली आहेत. रविवारी होणाऱ्या कार्यक्रमात ते उपस्थितांना मार्गदर्शन करणार आहेत.
...................
कुडाळ येथे भाजपतर्फे
‘चला खेळूया मंगळागौर’
कुडाळः भाजप महिला मोर्चा कुडाळच्या माध्यमातून ‘चला खेळूया मंगळागौर’ हा श्रावणातील पारंपरिक खेळ, फुगडी, उखाणे आणि हळदी-कुंकू कार्यक्रम सोमवारी (ता. ११) येथील महालक्ष्मी हॉलमध्ये आयोजित केला आहे. कार्यक्रमाचे उद्घाटन अभिनेत्री श्रद्धा खानोलकर यांच्या हस्ते, भाजप महिला जिल्हाध्यक्षा श्वेता कोरगावकर, राज्य परिषद सदस्य संध्या तेरसे यांच्या प्रमुख उपस्थितीत होणार आहे. या कार्यक्रमाला सर्व महिलांनी उपस्थित राहून मंगळागौर खेळाचा आनंद घ्यावा, असे आवाहन केले आहे. भाजप महिला मोर्चाच्या माध्यमातून रक्षाबंधन, कन्यापूजन, हळदी-कुंकू, फुगडी, रांगोळी स्पर्धा असे विविध उपक्रम घेण्यात येतात. या अंतर्गत आयोजित केलेल्या ‘चला खेळूया मंगळागौर’ कार्यक्रमात जास्तीत जास्त महिलांनी सहभागी व्हावे, असे आवाहन भाजप महिला मोर्चा कुडाळ अध्यक्ष आरती पाटील यांनी केले आहे.
.....................
‘म्हापण खवणे टॉवरचे
काम त्वरित सुरू करा’
कुडाळः म्हापण खवणे पागेरेवाडी येथील बीएसएनएलच्या मंजूर टॉवरचे काम सुरू न झाल्यास १५ ऑगस्टला उपोषणास बसण्याचा इशारा म्हापण ग्रामपंचायत सदस्य अविनाश खोत यांनी दूरसंचार विभागाला निवेदनाद्वारे दिला आहे. या निवेदनात म्हटले आहे की, म्हापण खवणे पागेरेवाडी येथे दूरसंचार टॉवरच्या कामाचे माजी खासदार विनायक राऊत यांच्या हस्ते भूमिपूजन झाल्यास आता वर्षाहून अधिक काळ झालेला आहे; मात्र अद्यापही या टॉवरच्या कामास सुरुवात झालेली नाही. याबाबत आपल्या कार्यालयाकडे तसेच सावंतवाडी व अन्य कार्यालयांकडे भेटून व दूरध्वनीवरून विचारणा केली असता केवळ आश्वासने देण्यात आली. प्रत्यक्ष कामास अद्याप सुरुवात झालेली नाही. त्यामुळे लोकप्रतिनिधींन ग्रामस्थांच्या रोषास सामोरे जावे लागत आहे. हे काम तातडीने सुरू न झाल्यास ग्रामस्थांना घेऊन १५ ऑगस्टला सावंतवाडी येथील जिल्हा दूरध्वनी कार्यालयासमोर उपोषण करण्यात येईल, असे खोत यांनी निवेदनात म्हटले आहे.