खेड-खेडमधील गरम पाण्याच्या कुंडांची दुरवस्था

83025

खेडमधील गरम पाण्याच्या कुंडांची दुरवस्था
नगरपालिकेचे दुर्लक्ष; उपोषणाचा इशारा
सकाळ वृत्तसेवा
खेड, ता. ८ : शहरातील ऐतिहासिक आणि वारसास्थळ असलेले गरम पाण्याचे कुंड गेल्या अनेक वर्षांपासून दुर्लक्षित आहे. गेल्या वर्षी महाराजा प्रतिष्ठान आणि स्थानिक नागरिकांच्या संयुक्त प्रयत्नांतून ही कुंड नागरिकांसाठी खुली केली होती; मात्र खेदाची बाब म्हणजे खेड पालिकेच्या उदासीनतेमुळे या कुंडांची पुन्हा दैनावस्था झाली आहे. कुंडांची स्वच्छता आणि देखभाल न झाल्यामुळे येथील सौंदर्य व ऐतिहासिक महत्त्व पुन्हा हरवण्याच्या मार्गावर आहे.
या संदर्भात महाराजा प्रतिष्ठान आणि दुर्गसेवक संघटनेच्यावतीने तहसील कार्यालयात निवेदन देण्यात आले. प्रशासनाने १२ ऑगस्टपर्यंत कुंडांची योग्य ती स्वच्छता व दुरुस्ती करून ती पुन्हा जनतेसाठी खुली न केल्यास १५ ऑगस्टला उपोषण करण्यात येईल, असा इशारा निवेदनातून देण्यात आला आहे. या आंदोलनाचे नेतृत्व दुर्गसेवक व महाराजा प्रतिष्ठानचे सचिव प्रणव मापुस्कर करणार असून, महाराजा प्रतिष्ठानचे मार्गदर्शक निखिल जामसंडेकर यांच्या मार्गदर्शनाखाली हे निवेदन देण्यात आले. या वेळी किरण तायडे, स्वराज गांधी, नरेंद्र जाधव, अभिजित मुंडेकर, आर्यन मापुस्कर आदी उपस्थित होते.