राज्य क्रिकेट स्पर्धेसाठी नयन आंबेकरची निवड

राज्य क्रिकेट स्पर्धेसाठी
नयन आंबेकरची निवड
रत्नागिरीः गोदूताई जांभेकर विद्यालयाच्या नयन आंबेकर याची रत्नागिरी जिल्हा क्रिकेट असोसिएशनमार्फत घेण्यात आलेल्या निवड चाचणीत निवड झाली. जिल्हा टेनिस क्रिकेट असोसिएशनतर्फे जिल्हास्तरीय क्रिकेट स्पर्धा निवड चाचणी प्रमोद महाजन क्रीडा संकुल येथे झाली. यामध्ये विद्यालयातील आंबेकर याची सोलापूर येथे होणाऱ्या राज्यस्तरीय स्पर्धेसाठी निवड झाली आहे. ही स्पर्धा १९ ते २१ ऑगस्टदरम्यान होणार आहे. नयनचे अभिनंदन रत्नागिरी एज्युकेशन सोसायटीचे सर्व पदाधिकारी, शाळा समिती अध्यक्ष राजन मलुष्टे, मुख्याध्यापिका संजना तारी, शिक्षक, शिक्षकेतर कर्मचारी व पालकांनी केले.
----------
क्षेत्रपाल नगरमध्ये
आरोग्यवर्धिनी केंद्र
खेड ः शहरातील क्षेत्रपाल नगर येथे नव्याने उभारण्यात आलेल्या नागरी आरोग्यवर्धिनी केंद्राचे उद्घाटन माजी जिल्हा परिषद आरोग्य व बांधकाम सभापती अरूण कदम यांच्या हस्ते झाले. उद्घाटनाप्रसंगी तालुका आरोग्य अधिकारी डॉ. शैलेश खरटमोल, माजी नगरसेवक रंगनाथ माने, प्रशांत कदम, युवासेना उपशहरप्रमुख तुषार सापटे आदी उपस्थित होते. या केंद्रामुळे क्षेत्रपाल नगर आणि आसपासच्या नागरिकांना अधिक सुलभ व जलद आरोग्यसेवा मिळणार आहे.
---------------
तायक्वांदो स्पर्धेत
गंधर्व धनेला कास्य
चिपळूण ः सावर्डे येथील गोविंदराव निकम माध्यमिक व उच्च माध्यमिक विद्यालयाच्या गंधर्व धने याने शालेय तायक्वांदो स्पर्धेत कास्यपदक पटकावले. ही तालुकास्तरीय स्पर्धा बांदल हायस्कूल येथे झाली. स्पर्धेत गोविंदराव निकम विद्यालयाच्या गंधर्व धने (१७ वर्षे) व मिहीर चव्हाण (१४ वर्षे ) यांनी सहभाग घेतला. त्यामध्ये धनेने दहा फाईट्स खेळत उत्तम कामगिरी करत कास्यपदक मिळवले. चिपळूण तालुक्यातील २१ शाळांनी भाग घेतला होता. क्रीडाशिक्षक रोहित गमरे, अमृत कडगावे, प्रशांत सकपाळ व दादासाहेब पांढरे यांनी विद्यार्थ्यांना मार्गदर्शन केले.