खत विक्रीचा ताळमेळ न लागल्यास कारवाई

खत विक्रीचा ताळमेळ न लागल्यास कारवाई

कृषी आयुक्त ः विक्रेत्यांच्या संयुक्त बैठकीत इशारा

सकाळ वृत्तसेवा
सिंधुदुर्गनगरी, ता. ८ ः राज्यातील कृषी केंद्र चालकांनी त्यांच्याकडील खत विक्रीनंतरचा शिल्लक साठा आणि पॉस मशीनमधील साठा यांचा दररोज ताळमेळ राखणे आवश्यक आहे. कृषी विभागाच्या तपासणीमध्ये त्यामध्ये तफावत आढळल्यास कडक कारवाई करण्याचा इशारा कृषी आयुक्त सूरज मांढरे यांनी खत विक्रेत्यांच्या संयुक्त बैठकीत दिला.
कृषी आयुक्त मांढरे यांच्या अध्यक्षतेखाली महत्त्वपूर्ण बैठक महाराष्ट्र फर्टिलायझर्स पेस्टीसाईड, सीड डिलर्स असोसिएशनच्या (माफदा) शिष्टमंडळाबरोबर झाली. येत्या दोन दिवसांत राज्यभर कृषी विभागाकडून खतांची धडक तपासणी मोहीम राबविण्यात येणार असून, कोणतीही सबब चालणार नाही, असे सांगत दोषींवर कारवाई करण्याचे स्पष्ट संकेत कृषी आयुक्तांनी दिले.
राज्यात खतसाठा अधिक असताना प्रत्यक्षात खते उपलब्धता का होत नाहीत? लोकप्रतिनिधींमार्फत कृषी विभागाकडे विचारणा केली जात आहे. त्या पार्श्वभूमीवर कृषी विभागाने कडक कारवाई करण्याचे संकेत बैठकीत दिले आहेत. खते विक्री झाल्यानंतर पॉस मशीनमधून लगेच साठा कमी करणे गरजेचे आहे. दुकानात गर्दी आहे, अपुरा कर्मचारी वर्ग असल्याने खत विक्री कमी करण्याचे राहून गेले, अशा सबबी खपवून न घेण्याबाबत कृषी आयुक्तांनी सूचित केले.
या पार्श्वभूमीवर सिंधुदुर्ग जिल्ह्यात सर्व खत विक्रेत्यांची तपासणी मोहीम राबविण्यात येत आहे. जिल्ह्यात सध्या रासायनिक खतांचा एकूण २४५२ मेट्रिक टन इतका खत साठा उपलब्ध आहे. त्यापैकी ८१० मेट्रिक टन युरियाचा साठा शिल्लक आहे.
केंद्राकडे युरिया व अन्य खतांची मागणी करायची झाल्यास पॉस मशीनमध्ये अधिक साठा दिसत असल्याने जिल्ह्याला मंजूर केलेल्या खत पुरवठ्यानुसार नवीन खते मिळण्यास अडचणी येतात, त्यामुळे अद्ययावत खतसाठा नोंद ठेवण्याची जबाबदारी कृषी केंद्र चालकांची आहे. त्यामुळे सर्व खत विक्री केंद्रांनी त्यांच्या पॉस मशीनवरील खतसाठा आणि प्रत्यक्ष गोडावूनमधील शिल्लक साठा यांचा ताळमेळ वेळच्यावेळी अद्ययावत करावयाचा आहे. जर विक्रेत्यांच्या पॉस मशीनवरील खत साठा प्रत्यक्ष शिल्लक असेलल्या खतसाठ्याशी जुळत नसेल, तर अशा विकेत्यांविरुद्ध खत नियंत्रण आदेश कायद्यांतर्गत कडक कायदेशीर कारवाई करण्यात येणार असल्याची माहिती जिल्हा अधीक्षक कृषी अधिकारी भाग्यश्री नाईकनवरे यांनी दिली.