विद्यार्थी, कर्मचारी, शिक्षकांचा सन्मान

विद्यार्थी, कर्मचारी, शिक्षकांचा सन्मान

सावंतवाडीतील सोहळा; आयुर्वेद महाविद्यालयाचा वर्धापन दिन

सकाळ वृत्तसेवा
सावंतवाडी, ता. ८ ः येथील राणी जानकीबाईसाहेव वैद्यकीय संस्थेच्या भाईसाहेब सावंत आयुर्वेद महाविद्यालयाचा ४१ वा वर्धापन दिन बुधवारी (ता. ६) उत्साहात साजरा करण्यात आला. या निमित्ताने आयोजित सोहळ्यात महाविद्यालयातील गुणवंत विद्यार्थी, उत्कृष्ट शिक्षक आणि कर्मचाऱ्यांचा गौरव करण्यात आला.
कार्यक्रमासाठी प्रमुख अतिथी म्हणून महाविद्यालयाच्या १९८९ च्या बॅचच्या विद्यार्थिनी आणि गडहिंग्लज येथील (कै.) केदारी रेडेकर आयुर्वेदिक महाविद्यालयाच्या प्राचार्या डॉ. शिवानी गवंडे उपस्थित होत्या. संस्थेचे सचिव गणेश बोर्डेकर आणि महाविद्यालयाचे प्राचार्य डॉ. संजय दळवी यांच्या हस्ते डॉ. गवंडे यांचा सत्कार करण्यात आला. आपल्या मनोगतात डॉ. गवंडे यांनी विद्यार्थ्यांना मोलाचे मार्गदर्शन केले.
या सोहळ्यात शैक्षणिक वर्ष २०२३-२४ आणि २०२२-२३ च्या बी.ए.एम.एस. परीक्षांमध्ये उत्कृष्ट कामगिरी करणाऱ्या विद्यार्थ्यांचा सन्मान करण्यात आला. यामध्ये प्रथम वर्ष बी.ए.एम.एस. २०२३-२४ मधील साफीन तांबोळी, अदिती सरमळकर आणि विनया चव्हाण, प्रथम वर्ष बी.ए.एम.एस. २०२२-२३ मधील रोशनी सिंह, साक्षी साहू व नागेश गजेंद्रगडकर आणि सानिका गवड, द्वितीय वर्ष बी.ए.एम.एस. २०२१-२२ मधील नवीन बाकी, राधिका मांजरेकर व कांचन रसाळ, श्वेता पवार यांना सन्मानचिन्ह देऊन गौरविले.
यावेळी महाविद्यालयातील उत्कृष्ट शिक्षक आणि कर्मचाऱ्यांचाही सत्कार करण्यात आला. यामध्ये प्राध्यापक डॉ. बी.डी. पाटील (उत्कृष्ट अध्यापक), स्नेहलता मुननकर (उत्कृष्ट लिपिक), सपना परब (अधिपरिचारिका) आणि विठ्ठल मोहिते (शिपाई) यांचा समावेश होता. माजी प्राचार्य डॉ. विकास कठाणे, डॉ. शिवप्रसाद म्हेत्रे, वैद्यकीय व्यावसायिक डॉ. सागर पाटील यांच्याकडून ५१ हजार रुपयांची देणगी महाविद्यालयाला मिळाली. या देणगीच्या व्याजातून ''स्वस्थवृत्त'' विषयात विद्यापीठात प्रथम येणाऱ्या विद्यार्थ्याला दरवर्षी वर्धापन दिन सोहळ्यात पारितोषिक दिले जाईल, असे जाहीर करण्यात आले. याप्रसंगी माजी प्राचार्य डॉ. दीपक तुपकर व डॉ. विकास कठाणे, प्रा. डॉ. संजय दळवी, संस्थेचे सचिव गणेश बोर्डेकर आणि संचालक अमोल सावंत यांनी विद्यार्थ्यांना मार्गदर्शन केले. कार्यक्रमाचे सूत्रसंचालन डॉ. राजेंद्र पाटील यांनी केले. प्रकाश पाटील यांनी मानपत्राचे वाचन केले. भार्गवराम शिरोडकर यांनी उपस्थितांचे आभार मानले. या सोहळ्याला संस्थेचे ज्येष्ठ संचालक सी. एल. नाईक आदी उपस्थित होते.