साडेआठ हजाराचा गुटखा; फोंडाघाट येथे एकावर गुन्हा

साडेआठ हजारांचा गुटखा;
फोंडाघाट येथे एकावर गुन्हा

कणकवली, ता. ८ ः फोंडाघाट (ता. कणकवली) येथे घरात साठवलेला साडेआठ हजारांचा गुटखा कणकवली पोलिसांनी जप्त केला. यात अवैध गुटखा विक्रीच्या उद्देशाने बाळगल्‍याप्रकरणी फोंडाघाट येथील नागेश गणपत कोरगावकर याच्यावर गुन्हा दाखल करण्यात आला. गुरुवारी (ता.७) सायंकाळी सव्वासातच्या सुमारास ही कारवाई करण्यात आली.
फोंडाघाट येथे विक्री आणि साठवणुकीस बंदी असलेल्‍या गुटख्याची विक्री होत असल्‍याची माहिती कणकवली पोलिसांना मिळाली होती. त्‍यानुसार गुरुवारी (ता.७) सायंकाळी सव्वा सातच्या सुमारास पोलिस उपनिरीक्षक पवन कांबळे, हवालदार सुभाष शिवगण, हवालदार पांडुरंग पांढरे, पोलिस स्वप्नील ठोंबरे, अस्मिता कारंडे आदींनी फोंडाघाट हवेलीनगर येथील नागेश गणपत कोरगावकर (वय ४३) याच्या राहत्‍या घरी छापा टाकला. घराच्या पडवीत ८ हजार ४९० रुपयांचा गुटखा आढळला. हा सर्व साठा पोलिसांनी जप्त केला. गुटखा विक्रीसाठी बाळगल्‍याप्रकरणी नागेश कोरगावकर याच्यावर अन्न सुरक्षा व मानके कायदा २००६ आणि भारतीय न्याय संहिता कलम २२३, २७५ प्रमाणे गुन्हा दाखल करण्यात आला. हवालदार सुभाष शिवगण अधिक तपास करत आहेत.