गळतीमुळे कशेडी बोगद्याला धोका नाही

गळतीमुळे कशेडी बोगद्याला धोका नाही
शिवेंद्रराजे भोसले ः उपाययोजना सुरू, पाग येथे अपघात प्रतिबंधाबाबत सूचना
सकाळ वृत्तसेवा
खेड/चिपळूण, ता. ८ : मुंबई-गोवा राष्ट्रीय महामार्गाच्या कशेडी ते रत्नागिरीदरम्यानच्या कामाची पाहणी सार्वजनिक बांधकाममंत्री सार्वजनिक बांधकाममंत्री शिवेंद्रराजे भोसले यांनी केली. कशेडी बोगद्याच्या गळतीवर उपाययोजना सुरू आहेत. कशेडी बोगद्यामध्ये सध्या गळती आहे; मात्र त्यामुळे बोगद्याला धोका नाही. गळती पूर्णपणे थांबविण्यासाठी उपाययोजना सुरू असून ती लवकरच पूर्ण केली जाईल, असे भोसले यांनी पाहणीदरम्यान सांगितले.
चिपळूण पाग पॉवरहाऊस ते कापसाळपर्यंत उड्डाणपूल बांधण्याचा प्रस्ताव केंद्राकडे पाठवला जाणार आहे. तोपर्यंत पाग पॉवरहाऊस येथे होणारे अपघात थांबवण्यासाठी उपाययोजना करण्याच्या सूचना त्यांनी केल्या. त्यात प्रामुख्याने रस्ता ओलांडण्यासाठी फूटब्रीज बांधणे, पॉवरहाऊसच्या चौकात सिग्नल यंत्रणा बसवणे, तेथे २४ तास पोलिस कार्यरत ठेवण्याची सूचना त्यांनी सार्वजनिक बांधकामखाते आणि पोलिसांना केली आहे.
या पाहणीदरम्यान कशेडी बोगद्याच्या पोलादपूर बाजूला मंत्री भोसले यांच्या हस्ते वृक्षारोपण करण्यात आले. या वेळी शिवसेना (शिंदे गट) उपनेते व माजी आमदार संजय कदम, मनसेचे राज्य सरचिटणीस वैभव खेडेकर, भाजपचे जिल्हाध्यक्ष संजय मोरे यानी भोसले यांची भेट घेऊन महामार्ग कामाबाबत चर्चा केली.
----
चौकट :
अपघातग्रस्त विद्यार्थ्यास आश्वासन
चिपळूण येथे सळी पडून जखमी झालेल्या विद्यार्थ्याच्या उपचारासाठी संबंधित ठेकेदाराकडून मदत करण्यात येणार असल्याचेही भोसले यांनी जाहीर केले. मुंबई-गोवा महामार्गाचे काम गतीने पूर्ण होण्यासाठी सर्वतोपरी प्रयत्न सुरू असून, नागरिकांच्या सोयीसाठी हे काम वेळेत पूर्ण करणे हे आमचे प्राधान्य आहे, असे भोसले यांनी सांगितले. शहरातील पुलाचे काम सुरू असताना झालेल्या अपघाताच्या पार्श्वभूमीवर संबंधित अधिकारी व ठेकेदारावर गुन्हा दाखल करावा, अशी मागणी निहार कोवळे यांनी निवेदनाद्वारे मंत्र्यांकडे केली.