वसोली शाळेची रिया शिंदे प्रथम

83278

वसोली शाळेची रिया शिंदे प्रथम

‘श्‍यामची आई संस्कार’ परीक्षा; निवृत्त मुख्याध्यापक संघाचे आयोजन

सकाळ वृत्तसेवा
माणगाव, ता. ९ ः कुडाळ तालुका माध्यमिक व उच्च माध्यमिक निवृत्त मुख्याध्यापक संघातर्फे घेतलेल्या ‘श्‍यामची आई संस्कार’ परीक्षेत को. ए. सो. यशवंत रा. परब विद्यालय वसोली शाळेची विद्यार्थिनी रिया शिंदे हिने कुडाळ तालुक्यात प्रथम येण्याचा मान मिळविला. द्वितीय भाविका सावंत (न्यू इंग्लिश स्कूल हळदीचे नेरुर), तृतीय क्रमांक अदिती खोचरे (वसोली हायस्कूल) व अनुश्री कविटकर (हळदीचे नेरुर) यांना विभागून देण्यात आला.
कुडाळ तालुक्यातील एकुण ९ विद्यालयांतून ही परीक्षा घेण्यात आली. यात १९७ विद्यार्थी प्रविष्ठ झाले. ही परीक्षा पाचवी ते सातवी व आठवी ते नववी या दोन गटांतून घेण्यात आली. प्रत्येक गटातून शाळेतून दोन क्रमांक व तालुक्यातून तीन क्रमांक आलेल्या विद्यार्थांना प्रमाणपत्र व भेटवस्तू देऊन सन्मानित केले. बक्षीस वितरण कार्यक्रम मराठा समागृह कुडाळ येथे पार पडला. या कार्यक्रमाच्या अध्यक्षस्थानी निवृत्त मुख्याध्यापक देवदत्त चुबे होते. व्यासपीठावर भरत गावडे, एस. बी. तावडे, सुधाकर वळंजू, विवेकानंद बालम उपस्थित होते.
यावेळी निवृत्त मुख्याध्यापकांनी निवृत्तीनंतरही विविध क्षेत्रात उल्लेखनीय कामगिरी केलेल्या मुख्याध्यापकांचा मान्यवरांच्या हस्ते गौरव करण्यात आला. त्यामध्ये प्रशांत धोंड, मुकुंद धुरी, प्रकाश कुबल, दीपक आळवे, अजय शिंदे यांचा समावेश होता. यावेळी निवृत्त मुख्याध्यापक संघाचे अध्यक्ष मंगेश मराठे यांच्यासह आजी माजी मुख्याध्यापक उपस्थित होते. अशोक येजरे यांनी सूत्रसंचालन केले. विवेकानंद बालम यांनी प्रास्ताविक केले. गुरुदास कुजगावकर यांनी आभार मानले.