रत्नागिरी- भ्रष्ट मंत्र्यांविरोधात उद्या शिवसेना शैलीत आंदोलन

भ्रष्ट मंत्र्यांविरोधात शिवसेनेचे उद्या आंदोलन
बाळ माने ः ठाकरे गट जिल्हाधिकारी कार्यालयावर देणार धडक
सकाळ वृत्तसेवा
रत्नागिरी, ता. ९ : महाराष्ट्रातील भ्रष्ट व गैरकृत्ये करणाऱ्या मंत्र्यांना मुख्यमंत्री देवेंद्र फडणवीस यांनी पाठीशी न घालता राजीनामा घ्यावा, या मागणीसाठी सोमवार (ता. ११) ऑगस्टला महाराष्ट्रातील सर्व जिल्ह्यांत एकाच ठिकाणी रस्त्यावर उतरून शिवसेना स्टाईलने १५०० ते २००० लोकांच्या उपस्थितीत आंदोलन करण्यात येणार आहे. तसे आदेश उद्धव बाळासाहेब ठाकरे पक्षाचे प्रमुख उद्धव ठाकरे यांनी दिल्याची माहिती शिवसेना उपनेते बाळ माने यांनी दिली.
रत्नागिरी जिल्ह्यातील शिवसेना, युवा सेना, महिला आघाडी, शिवसहकार सेना, रिक्षासेना व सर्व अंगीकृत संघटनेतील सर्व पदाधिकारी, शिवसैनिक व तमाम जनता जनार्दन यांना तसे कळवण्यात आले आहे. शिवसेना पक्षप्रमुख तथा माजी मुख्यमंत्री उद्धव ठाकरे यांच्या आदेशान्वये व शिवसेना नेते तथा माजी खासदार विनायक राऊत व शिवसेना नेते तथा आमदार भास्कर जाधव यांच्या मार्गदर्शनाखाली सध्या महाराष्ट्रातील भ्रष्ट व गैरकृत्ये करणाऱ्या मंत्र्यांना मुख्यमंत्री देवेंद्र फडणवीस यांनी पाठीशी न घालता राजीनामा घ्यावा, या मागणीसाठी राज्यभरात हे आंदोलन होणार आहे. सोमवार सकाळी ११.०० वाजता जिल्हाधिकारी कार्यालय रत्नागिरी येथे या आंदोलनात शिवसेना, युवासेना, महिला आघाडी, शिवसहकार सेना, रिक्षासेना व सर्व अंगीकृत संघटनेतील सर्व पदाधिकारी, शिवसैनिक व तमाम नागरिकांनीही मोठ्या संख्येने सहभागी व्हावे, असे आवाहन शिवसेना उपनेते बाळ माने, संपर्कप्रमुख सहदेव बेटकर, जिल्हाप्रमुख रत्नागिरी (दक्षिण) दत्तात्रय कदम, जिल्हाप्रमुख रत्नागिरी (उत्तर) बाळा खेडेकर यांनी केले आहे.